თბილისი, 31 იანვარი – Sputnik. დედაქალაქში ყველაზე მაღალი შენობების ჩამონათვალში სამი ფეშენებელური სასტუმრო და ორი ელიტური საცხოვრებელი კომპლექსი შევიდა.
პირველ ადგილზეა 37-სართულიანი Axis Towers-ის ტყუპი ცათამბჯენი, რომელიც ვაკეში, ჭავჭავაძის გამზირზე ააშენეს.
Axis Towers 147-მეტრიანი ცათამბჯენებია. ერთ მათგანში საცხოვრებელი ბინებია განთავსებული, სადაც 1 კვ.მ-ის ღირებულება საშუალოდ 2 ათასი დოლარიდან იწყება. მეორე შენობაში განთავსებულია ფიტნეს-ცენტრი, აუზი, კომერციული ობიექტები და ხუთვარსკვლავიანი სასტუმრო, რომლის ნომრის ღირებულება საშუალოდ 190 დოლარია დღე-ღამეში.
ვაკე საცხოვრებლის სიძვირით მეორეა თბილისში.
Axis Towers
© courtesy of Axis Towers
ყველაზე მაღალი შენობების სიაში მეორე ადგილზეა ხუთვარსკვლავიანი სასტუმრო The Biltmore Tbilisi Hotel. ის მთაწმინდის რაიონში, რუსთაველის გამზირზე მდებარეობს. ყველაზე ძვირი საცხოვრებელი ფართი თბილისში სწორედ ამ რაიონშია.
რაც შეეხება სასტუმროს, ესაა 32-სართულიანი 138 მეტრი სიმაღლის შენობა. ამ სასტუმროში ნომრის ღირებულება 220 დოლარიდან იწყება.
მესამე ადგილზეა მრავალფუნქციური პრემიუმ-კლასის კომპლექსი ალექსიძის ქუჩაზე King David Building. კომპლექსი საბურთალოს რაიონის დასაწყისშია. საბურთალო სიძვირით მესამე ადგილზეა.
კომპლექსი აერთიანებს ორ ცათამბჯენს – 31- და 19-სართულიანს. მაღალი ცათამბჯენის სიმაღლე 115 მეტრია. მასში განთავსებულია საცხოვრებელი ბინები, ხოლო უფრო დაბალ შენობაში ბიზნეს-ცენტრია.
ბინების ღირებულება თეთრი კარკასის მდგომარეობაში იწყება დაახლოებით 3 ათასი დოლარიდან (1 კვ.მ).
მეოთხე ადგილზეა კიდევ ერთი ხუთვარსკვლავიანი სასტუმრო Radisson Blu Iveria Hotel, რომელიც მთაწმინდის რაიონში, რესპუბლიკის მოედანზეა.
Radisson Blu Iveria
© courtesy of Radisson BLU hotel
Radisson Blu Iveria Hotel-ის სიმაღლეა 86 მეტრი. ის 18-სართულიანია. ნომრის ღირებულება დაახლოებით 130 დოლარიდან იწყება.
ბოლო, მეხუთე ადგილზეა ოთხვარსკვლავიანი სასტუმრო Holiday Inn Tbilisi, რომელიც საბურთალოზე, 26 მაისის მოედანზე მდებარეობს.
პეკინის გამზირი
© photo: Sputnik / Alexander Imedashvili
შენობა 21-სართულიანი და 70 მ სიმაღლისაა. ნომრის ღირებულება სასტუმროში დაახლოებით 120 დოლარიდან იწყება.