ირაკლი კობახიძემ ბასკების უმაღლესი ჯილდო მიიღო

თბილისი, 29 იანვარი – Sputnik. პარტია „ქართული ოცნება-დემოკრატიული საქართველოს“ თავმჯდომარე ირაკლი კობახიძე ბილბაოში საბინო არანას ფონდის უმაღლესი ჯილდოთი დაჯილდოვდა, იუწყება პარტიის პრეს-სამსახური.

Sabino Arana Foundation არის ბასკური კულტურული ფონდი, რომელიც მიზნად ისახავს ბასკური კულტურის, ენისა და ბასკური ნაციონალიზმის პოპულარიზაციას, შესწავლას და გავრცელებას. შეიქმნა 1988 წლის 11 ოქტომბერს ბასკეთის ნაციონალისტური პარტიის მიერ. ფონდს ეწოდა მე-19 საუკუნის ბასკი ნაციონალისტის და ბასკური ნაციონალისტური პარტიის დამფუძნებლის, საბინო არანას სახელი.

კობახიძის თქმით, რამდენიმე მეცნიერული დასკვნით დასტურდება, რომ ბასკებსა და ქართველებს შორის ისტორიული კავშირი არსებობს.

„მიუხედავად იმისა, რომ ბასკეთსა და საქართველოს შორის გეოგრაფიული მანძილი საკმაოდ დიდია, აშკარაა მსგავსება კულტურაში, ტრადიციებსა და ფოლკლორში. მეღვინეობა ჩვენი კულტურების არსებითი მახასიათებელია, რაც მეტყველებს, რომ ჩვენ საერთო ფესვები გვაქვს. ასევე, ქართული და ბასკური ენები სტრუქტურულად ახლოსაა ერთმანეთთან“, - განაცხადა კობახიძემ.

მმართველი პარტიის თავმჯდომარემ ასევე აღნიშნა, რომ თბილისის სახელმწიფო უნივერსიტეტში ბასკური ენის კათედრა გაიხსნა. ქვეყნებს შორის არსებობს უწყვეტი პარტნიორობა, მათ შორის კულტურის, განათლების, სპორტის, ტურიზმის, გასტრონომიისა და ინვესტიციების სფეროებში.

გავრცელებული ინფორმაციით, ირაკლი კობახიძე აღნიშნული ჯილდო ქართველებსა და ბასკებს შორის მეგობრობის გაღრმავების, დემოკრატიისა და ადამიანის უფლებების დაცვისთვის მიიღო.