თბილისი, 4 იანვარი — Sputnik. იტალიელი სომელიე მარკო კასტელანელის თქმით, ალკოჰოლური სასმელებიდან შუშხუნა ღვინო ყველაზე მძიმე ნაბახუსევს იწვევს.
როგორც ორგანიზაცია Club Vino-ს თანადამფუძნებელმა სომელიემ აღნიშნა, მთელი საქმე გაზის ბუშტუკებშია.
„პროსეკო (იტალიური შუშხუნა ღვინო) და შამპანური ნახშირორჟანგს შეიცავს. ის კი გავლენას ახდენს ალკოჰოლის სისხლში გადასვლაზე, ეხმარება ორგანიზმს ალკოჰოლის უფრო სწრაფად შეწოვაში“, — განმარტა მან.
კასტელანელის თქმით, სისხლში მოხვედრისას ნახშირორჟანგი ნაწილობრივ გამოდევნის ჟანგბადს, რაც შუშხუნა ღვინოებით თრობას აჩქარებს. შედეგად – ნაბახუსევი განსაკუთრებით რთულად შეიგრძნობა, მეორე დღეს ადამიანს თავის მტანჯველი ტკივილი აწუხებს.
სომელიემ ხაზგასმით აღნიშნა, რომ ნაბახუსევი ადამიანს შეიძლება მაშინაც დაემართოს, თუ მხოლოდ ერთ ან ორ ჭიქა შუშხუნა ღვინოს დალევს.
კასტელანელი რამდენიმე რჩევას აძლევს შამპანურისა და შუშხუნა ღვინოების მოყვარულებს იმისთვის, რომ მძიმე ნაბახუსევი და თავის ტკივილი აირიდონ. მისი რეკომენდაციები ასე გამოიყურება:
არასდროს მიირთვათ შუშხუნა ღვინო მშიერ კუჭზე;
სვით ის ძალიან ნელა;
ყოველი ჭიქა შამპანურის შემდეგ დალიეთ ერთი ჭიქა წყალი;
ძილის წინ ასევე მიირთვით წყალი.
მანამდე ცნობილმა ექიმ-ნარკოლოგმა დაასახელა მეთოდი, როგორ აღვიდგინოთ ნაბახუსევზე ორგანიზმი სწრაფად. მან რამდენიმე მეთოდი, შესაფერისი საუზმე და ეფექტური პრეპარატები ჩამოთვალა.