თბილისი, 26 დეკემბერი – Sputnik. დედაქალაქის მერი კახა კალაძე ე.წ. საცობებთან დაკავშირებული პრობლემების გადაჭრის გზას საზოგადოებრივი ტრანსპორტის განვითარებაში ხედავს. ამის შესახებ მან ჟურნალისტებს ქალაქის გზებზე შექმნილი ვითარების კომენტირებისას განუცხადა.
როგორც კალაძემ აღნიშნა, დედაქალაქში წარმოქმნილი „საცობები“ ავტომობილების რეკორდული ზრდის შედეგია.
კალაძემ ხაზგასმით აღნიშნა, რომ დედაქალაქის მერია ძალისხმევას არ იშურებს იმისთვის, რომ განვითარდეს საზოგადოებრივი ტრანსპორტი და ამით მოგვარდეს ეს პრობლემა. თბილისის მერმა ამ საკითხზე ოპოზიციის წარმომადგენლების შენიშვნებს აბსურდული უწოდა.
„ოპოზიციაში საერთოდ სატრანსპორტო პოლიტიკის გაგებაში არ არიან და წარმოდგენა არ აქვთ, რა უნდა გაკეთდეს ქალაქში ამ მიმართულებით. რაც შეეხება „საცობებს“, თბილისში, განსაკუთრებით პიკის საათებში, ფიქსირდება კერძო ავტომობილების რეკორდული მაჩვენებელი“, – განაცხადა კალაძემ.
მისი თქმით, 2012 წლამდე დედაქალაქში 180 ათასამდე კერძო ავტომობილი მოძრაობდა, დღეს კი პიკის საათებში ეს მაჩვენებელი 600 ათასს აღწევს.
„წარმოიდგინეთ, ეს რიცხვი მუდმივად მზარდია. ყოველწლიურად კერძო ავტომობილების რაოდენობა იზრდება. რა უნდა დავუპირისპიროთ ამას? უნდა დავუპირისპიროთ ერთი რამ – საზოგადოებრივი ტრანსპორტის განვითარება, ხელმისაწვდომობა, ინფრასტრუქტურის შექმნა ისე, რომ საზოგადოებრივი ტრანსპორტით გადაადგილება იყოს სწრაფი და კომფორტული“, – განაცხადა კალაძემ.