თბილისი, 15 დეკემბერი − Sputnik. კანადამ, „შეცვლილი გარემოებების“ გათვალისწინებით, სანქციები აღადგინა რუსეთის გაზსადენ „ჩრდილოეთის ნაკადი-1“-ის ტურბინების მიმართ, განაცხადეს კანადის საგარეო საქმეთა მინისტრმა მელანი ჟოლიმ და ბუნებრივი რესურსების მინისტრმა ჯონათან უილიამსმა.
„პუტინი იძულებული გახდა ეჩვენებინა, რომ „ჩრდილოეთის ნაკადი-1“-ის სრულფასოვანი მუშაობის აღდგენა მის განზრახვებში არ შედიოდა. ამასთან თავად მილსადენი მწყობრიდანაა გამოსული. ამის გათვალისწინებით, კანადის მთავრობამ გადაწყვიტა, აღადგინოს დროებით მოხსნილი სანქციები, რაც „სიმენსის“ მონრეალის ქარხანაში გარემონტებული ტურბინების გერმანიაში დაბრუნებას ხდიდა შესაძლებელს“, − ნათქვამია კანადელი მაღალჩინოსნების ერთობლივ განცხადებაში.
აქვე აღნიშნულია, რომ კანადამ ეს გადაწყვეტილება „უკრაინასთან, გერმანიასთან და სხვა ევროპელ მოკავშირეებთან მჭიდრო ურთიერთქმედებით“ მიიღო.
კანადამ მიმდინარე წლის ივლისში ამოიღო სანქციების სიიდან მონრეალში შესაკეთებლად გატანილი ექვსი ტურბინა „ჩრდილოეთის ნაკადისთვის“. ამასთან, მიუხედავად უკრაინის პროტესტისა, მათი გერმანიაში გადატანის ნებართვაც გაიცა, საიდანაც ის „გაზპრომს“ უნდა დაბრუნებოდა.
„გაზპრომმა“ ზაფხულში ჯერ შეამცირა „ჩრდილოეთის ნაკადი-1“-ით ევროპისთვის გაზის მიწოდება, ხოლო სექტემბრის დასაწყისში საერთოდ შეწყვიტა აირის ექსპორტი. სექტემბრის ბოლოს კი „ჩრდილოეთის ნაკადების“ ოთხიდან სამ ტოტზე დივერსია მოხდა, რითაც რუსული მილსადენები მთლიანად გამოვიდა მწყობრიდან. რუსეთის პროკურატურამ მომხდარი საერთაშორისო ტერორიზმის აქტად შეაფასა, ხოლო ევროკავშირმა ინციდენტის გამოძიება დაიწყო.