თბილისი, 6 დეკემბერი – Sputnik. თბილისის საქალაქო სასამართლომ უცხოელი ტურისტების კუთვნილი თანხების თაღლითურად დაუფლების ფაქტებზე 14 ბრალდებული დამნაშავედ ცნო. ამის შესახებ ინფორმაციას საქართველოს პროკურატურა ავრცელებს.
გამოძიებამ დაადგინა, რომ კლუბების „ქალაქურის“ და „როიალის“ მფლობელმა ხუთ თანამზრახველთან ერთად ორგანიზებული ჯგუფი შექმნა. ბრალდებულთა მიერ შემუშავებული გეგმის მიხედვით, მეტი ფინანსური სარგებლის მიღების მიზნით ე.წ. პრომო-გოგონები საქართველოში ჩამოსულ უცხოელ ტურისტ მამაკაცებს სოციალური ქსელის მეშვეობით უკავშირდებოდნენ, ზემოაღნიშნულ კლუბებში ხვდებოდნენ და თავს აპატიჟებინებდნენ.
„ანგარიშსწორებისას ტურისტებს დანაშაულებრივი ჯგუფის წევრები მიღებული მომსახურების შეუსაბამოდ დიდი თანხების გადახდას სთხოვდნენ, უარის შემთხვევაში კი მათზე ფსიქოლოგიურ ძალადობას ახორციელებდნენ“, – აღნიშნულია განცხადებაში.
პროკურატურის ცნობით, ბრალდებულები აღნიშნული ხერხით არაერთი ქვეყნის მოქალაქის, მათ შორის იემენის, ეგვიპტის, ინდოეთის, სუდანის და ბელარუსის 6 მოქალაქის კუთვნილ 9.340 ლარს თაღლითურად დაეუფლნენ.
ორგანიზებული ჯგუფის წევრებს ბრალდება სსკ-ის 180-ე (ორგანიზებული ჯგუფის მიერ ჩადენილი თაღლითობა, რამაც მნიშვნელოვანი ზიანი გამოიწვია) მუხლით წარედგინათ.
სასამართლომ დანაშაულის ორგანიზატორებს, მათ შორის აღნიშნული კლუბების მეპატრონეს, სასჯელის სახით 8 წლითა და 6 თვით თავისუფლების აღკვეთა, ხოლო კლუბების ორ მენეჯერს 8-8 წლით პატიმრობა შეუფარდა. რაც შეეხება ორგანიზებული ჯგუფის სხვა წევრებს, მათ არასაპატიმრო სასჯელზე საპროცესო შეთანხმება გაუფორმდათ.