ქარი, ნისლი და წვიმა: როგორი ამინდია მოსალოდნელი საქართველოში უახლოეს დღეებში

თბილისი, 29 ნოემბერი – Sputnik. სინოპტიკოსები საქართველოს ტერიტორიაზე უახლოეს დღეებში წვიმიან და ნისლიან ამინდს პროგნოზირებენ.

გარემოს ეროვნული სააგენტოს ცნობით, 3 დეკემბრამდე დასავლეთ საქართველოს ცალკეულ რაიონებში სითბოს ფონზე მცირე წვიმაა მოსალოდნელი. შავი ზღვის სანაპირო რაიონებში, ზემო იმერეთსა და კოლხეთის დაბლობზე კი იქროლებს აღმოსავლეთის მიმართულების ძლიერი ქარი. ჰაერის ტემპერატურა დღისით დაბლობ რაიონებში +14-19 გრადუსი იქნება.

აღმოსავლეთ საქართველოში კი მოსალოდნელია შედარებით ცივი, ღრუბლიანი, ნისლიანი და დროგამოშვებით ნალექიანი ამინდი. ჰაერის ტემპერატურა ბარში დღის საათებში +4-9 გრადუსი დაფიქსირდება.

რაც შეეხება დედაქალაქს, თბილისში 3 დეკემბრამდე შედარებით ცივი, ღრუბლიანი, ნისლიანი და დროგამოშვებით წვიმიანი ამინდია მოსალოდნელი. ჰაერის ტემპერატურა დღის საათებში +7-9 გრადუსი იქნება.