თბილისი, 27 ნოემბერი – Sputnik. საქართველოს პარლამენტი იწყებს „წამლისა და ფარმაცევტული საქმიანობის შესახებ“ კანონში შესატანი ცვლილებების განხილვას, რომლებიც მედიკამენტების რეალიზაციის წესების დარღვევისთვის ჯარიმების გამკაცრებას და ახალი სანქციების დაწესებას ითვალისწინებს.
კანონპროექტის მიხედვით, ფარმაცევტული პროდუქტის რეალიზაციის დაწყება და დასრულება სააგენტოსთვის სავალდებულო შეტყობინების გარეშე გამოიწვევს დაჯარიმებას 4 ათასი ლარის ოდენობით. თუ იგივე ქმედება ჩადენილი იქნება განმეორებით, ჯარიმა 8 ათას ლარს შეადგენს.
მთავრობის მონაცემებით, 2022 წლის 1 იანვრიდან 1 ნოემბრამდე პერიოდში 166 მსგავსი დარღვევა გამოვლინდა, დაჯარიმდა 39 აფთიაქი, ხოლო 2021 წელს გამოვლინდა 205 დარღვევა, დაჯარიმდა 61 ობიექტი.
ფარმაცევტული პროდუქტის რეფერენტულ საცალო ფასზე მაღალ ფასად რეალიზაციის წესის დარღვევა გამოიწვევს გაფრთხილებას, თუ იგივე ქმედება ჩადენილი იქნება განმეორებით - დაჯარიმებას 5 ათასი ლარის ოდენობით.
ასევე ფარმაცევტული პროდუქტის რეფერენტულ საბითუმო ფასზე მაღალ ფასად რეალიზაციის წესის დარღვევა გამოიწვევს დაჯარიმებას 22.500 ლარის ოდენობით. თუ იგივე ქმედება ჩადენილი იქნება განმეორებით - 45 ათასი ლარის ოდენობით.
ფარმაცევტული პროდუქტის მიმოქცევის შესახებ ინფორმაციის/დოკუმენტის ხელმისაწვდომობის წესის დარღვევა გამოიწვევს გაფრთხილებას. თუ იგივე ქმედება ჩადენილი იქნება განმეორებით, გამოიწვევს დაჯარიმებას 5 ათასი ლარის ოდენობით.
ამავე პროექტით, ფარმაცევტული პროდუქტის წარმოება საქართველოს ნაციონალური GMP სერტიფიკატის გარეშე გამოიწვევს დაჯარიმებას 50 ათასი ლარის ოდენობით, სამართალდარღვევის საგნის კონფისკაციით, განმეორების შემთხვევაში კი ჯარიმა გაორმაგდება.
გარდა ამისა, ფარმაცევტული პროდუქტის საბითუმო დისტრიბუცია საქართველოს ნაციონალური GDP სერტიფიკატის ფლობის გარეშე გამოიწვევს დაჯარიმებას 30 ათასი ლარის ოდენობით, სამართალდარღვევის საგნის კონფისკაციით, განმეორების შემთხვევაში დარღვევა გაორმაგდება.