„ქართული ოცნება“: ევროპარლამენტის რეზოლუციებს საქართველოს წინააღმდეგ იარაღად იყენებენ

თბილისი, 23 ნოემბერი – Sputnik. ოპოზიციური პარტია „ერთიანი ნაციონალური მოძრაობა“ და მისი უცხოელი მხარდამჭერები ევროპარლამენტის (EP) რეზოლუციებს საქართველოს წინააღმდეგ პოლიტიკურ იარაღად იყენებენ, განაცხადა პარლამენტის საგარეო ურთიერთობათა კომიტეტის ხელმძღვანელმა ირაკლი ჩიქოვანმა.

ევროპარლამენტმა 9 ივნისს საქართველოსთან დაკავშირებით მკაცრი რეზოლუცია მიიღო, რომელშიც, მათ შორის, ლაპარაკია ივანიშვილის დესტრუქციულ როლზე, სადაც ის „ერთადერთ ოლიგარქად“ არის მოხსენებული, „რომელსაც პირადი და საქმიანი კავშირები აქვს კრემლთან“. ევროპული საბჭოსთვის მიცემული რეკომენდაციებიდან ერთ-ერთი სწორედ ივანიშვილის წინააღმდეგ ინდივიდუალური სანქციების დაწესებაა.

ევროპარლამენტი ასევე მოუწოდებს ქვეყნის ხელისუფლებას, გაათავისუფლოს და სამკურნალოდ საზღვარგარეთ გადაიყვანოს ოპოზიციური პარტია „ერთიანი ნაციონალური მოძრაობის" დამფუძნებელი, ექს-პრეზიდენტი მიხეილ სააკაშვილი, ასევე გაათავისუფლოს ოპოზიციური ტელეკომპანია „მთავარი არხის" გენერალური დირექტორი ნიკა გვარამია.

დეკემბერში ევროპარლამენტმა პლენარულ სხდომაზე უნდა დაამტკიცოს რეზოლუცია, რომელიც შემუშავდება საქართველოს მიერ ევროკავშირთან ასოცირების შეთანხმების პირობების შესრულების ანგარიშის მიხედვით.

ანგარიშში გამოთქმულია შეშფოთება ღრმა პოლარიზაციის გამო საქართველოს პოლიტიკურ გარემოში, ასევე საუბარია გვარამიას საქმის გადახედვის, სააკაშვილის გათავისუფლების აუცილებლობაზე და მისთვის „სათანადო მკურნალობის“ უზრუნველყოფაზე. იქვე საუბარია „პოლიტიზებული მართლმსაჯულების აშკარა დემონსტრაციაზე“ TBC Bank-ის დამფუძნებლების, ოპოზიციური პარტია „ლელოს" ლიდერების მამუკა ხაზარაძისა და ბადრი ჯაფარიძის მიმართ.

„ევროპის სახალხო პარტიამ“, რომლის წევრიცაა „ერთიანი ნაციონალური მოძრაობა“, მოახდინა 200 შესწორების ინიცირება რეზოლუციის საბოლოო ტექსტში, რომლებიც მას უფრო მეტად ამკაცრებს.