თბილისი, 15 ნოემბერი – Sputnik. საქართველოს ნაკრებისა და ამსტერდამის „აიაქსის“ ყოფილი თავდამსხმელი და წარმატებული მწვრთნელი შოთა არველაძე იმედოვნებს, რომ ხვიჩა კვარაცხელია ეროვნულ ნაკრებში გატანილი გოლების მის მიერ დამყარებულ რეკორდს გააუმჯობესებს, ამის შესახებ მან Corriere del Mezzogiorno-ს განუცხადა.
შოთა არველაძე საქართველოს ეროვნული ნაკრების ისტორიაში საუკეთესო ბომბარდირია. მან 61 მატჩში 26 გოლი გაიტანა.
„სულაც არ მეშინია, თუ ხვიჩა ჩემს საგოლე რეკორდს გააუმჯობესებს. ნუ ღელავთ, პირიქით, ამას ვუსურვებ. ყველაფერს თავისი დრო აქვს, ჩვენ კი უკვე წარსულში ვართ. იმედი მაქვს, ის შეძლებს საქართველოს მწვერვალზე აყვანას. ჩვენი დიდი ოცნება ევროპისა და მსოფლიო ჩემპიონატების ფინალურ ეტაპზე გასვლაა. კვარასთან ერთად ჩვენ ეს შეგვიძლია“, – განაცხადა შოთა არველაძემ.
არველაძის თქმით, კვარაცხელია „დიდი ფეხბურთელია“ და უკვე გამოირჩევა გუნდში, რომელიც ძალიან კარგად თამაშობს.
„პარასკევს მან მითხრა, რომ ნეაპოლში კარიერის საუკეთესო პერიოდი აქვს, მაგრამ ზურგი ისევ სტკივა, თუმცა იმედოვნებს, რომ მოედანზე მალე დაბრუნდება“, – განაცხადა არველაძემ.
მისი თქმით, კვარაცხელია ქართველი ხალხისთვის საუკეთესო ფეხბურთელია და ის საქართველოს ნაკრებს დიდ პერსპექტივას უხსნის.