თბილისი, 1 ნოემბერი — Sputnik. თბილისში ორშაბათს ადგილობრივი ეკონომიკური განვითარების რიგით მე-12 ფორუმი დაიწყო, იუწყება დედაქალაქის მერიის პრეს-სამსახური.
ფორუმი ორი დღე გაგრძელდება, დედაქალაქის ხელისუფლებიდან მას ესწრებიან თბილისის მერი კახა კალაძე, საკრებულოს თავმჯდომარე გიორგი ტყემალაძე. მერიის განცხადებით, ფორუმი ურბანისტული განვითარების პერსპექტივებზე და თანამედროვე ტენდენციებზე მსჯელობის საშუალებას იძლევა.
„წლების განმავლობაში აღნიშნული ფორუმი ქალაქების მდგრადი განვითარების მიმართულებით გამოცდილების, თანამედროვე მიდგომების გაზიარებისა და ახალი იდეების გააზრების ეფექტურ პლატფორმად ჩამოყალიბდა. ჩვენ განვაგრძობთ ამ მრავალწლიან ტრადიციას“, – განაცხადა კალაძემ.
როგორც პოლიტიკოსმა აღნიშნა, მნიშვნელოვანია თბილისში ურბანისტული განვითარების ტემპი და მისასალმებელია ამ მიმართულებით ბოლო მიღწევები.
ფორუმი 2007 წლიდან ყოველ წელს იმართება. მას სტუმრობენ ადგილობრივი და საერთაშორისო სპიკერები, სხვადასხვა დარგის ექსპერტები, მუნიციპალიტეტებისა და აკადემიური წრეების წარმომადგენლები. ფორუმის ორგანიზატორია თბილისის მერიის ეკონომიკური განვითარების საქალაქო სამსახური.
ღონისძიების მთავარი მიზანია გამოცდილების, თანამედროვე მიდგომებისა და იდეების გაზიარება, რომელიც თანამშრომლობის ჩამოყალიბებისა და ქალაქების განვითარების მდგრად და გრძელვადიან პერსპექტივას ქმნის. ფორუმის თემატიკა ურბანული განვითარების თანამედროვე ტენდეციებსა და საჭიროებებს მოიცავს, რომელიც ქალაქების სრულ ჩართულობასა და პროაქტიურ ქმედებებს მოითხოვს.