ქართველმა ძიუდოისტებმა ევროპის ჩემპიონატი სარაევოში სამი მედლით დაასრულეს

თბილისი, 30 ოქტომბერი – Sputnik. საქართველოს ძიუდოისტთა ნაკრებმა სარაევოში 23-წლამდელთა ევროპის ჩემპიონატზე გუნდურ შეჯიბრებაში ბრინჯაო მოიპოვა.

ქართველმა ძიუდოისტებმა მესამე ადგილისთვის ბრძოლაში საფრანგეთის ნაკრები ანგარიშით 4:1 დაამარცხეს.

ინდივიდუალურ ჩათვლაში გუნდმა ორი ოქროს და ერთი ბრინჯაოს მედალი მოიპოვა. ტურნირის გამარჯვებულები ილია სულამანიძე (100 კგ) და ნიკა ხარაზიშვილი (90 კგ) გახდნენ, ხოლო მძიმეწონოსანმა საბა ინანეიშვილმა (+100 კგ) ბრინჯაოს მედალი მოიპოვა.

ამგვარად, საქართველოს ძიუდოისტთა ნაკრებმა საერთო ჩათვლაში მეორე ადგილი დაიკავა.

საქართველოს ძიუდოისტთა ნაკრები სარაევოში 27 ოქტომბერს გაემგზავრა და იყო წარმოდგენილი 13 სპორტსმენით - ცხრა ვაჟი და ოთხი გოგონა. ტურნირი სარაევოში 28 ოქტომბერს დაიწყო და 30 ოქტომბერს დასრულდა.