თბილისი, 27 ოქტომბერი – Sputnik. საქართველოს პრემიერ-მინისტრმა ირაკლი ღარიბაშვილმა ქვეყნის მოსახლეობას აფხაზური ენის დღე მიულოცა.
აფხაზური ენა საქართველოში მეორე სახელმწიფო ენაა.
„სრულიად საქართველოს, ყველას, ვისთვისაც ჩვენი საერთო სიმდიდრის – აფხაზური ენის და კულტურული თვითმყოფადობის დაცვა და შენარჩუნება მნიშვნელოვან ღირებულებას და პასუხისმგებლობას წარმოადგენს, ვულოცავ აფხაზური ენის დღეს“, – აღნიშნულია პრემიერის მილოცვის წერილში, რომელსაც მთავრობის ადმინისტრაცია აქვეყნებს.
როგორც მთავრობის მეთაურმა აღნიშნა, ქართულთან ერთად, აფხაზური ენა საქართველოს კონსტიტუციით არის დაცული და ერთიანი ენობრივი საგანძურის განუყოფელი ნაწილია.
„საქართველოს მთავრობა განაგრძობს ქმედითი ნაბიჯების განხორციელებას აფხაზური ენის სამეცნიერო შესწავლის, განვითარებისა და პოპულარიზაციის მიზნით. უაღრესად მნიშვნელოვანია, მივმართოთ ერთიანი ძალისხმევა ჩვენს აფხაზ თანამემამულეებთან ერთად, რომ გადავარჩინოთ და შევინარჩუნოთ უნიკალური აფხაზური ენა“, – განაცხადა ღარიბაშვილმა.
2007 წელს ანტვერპენში (ბელგია) გამართულ დიასპორების წარმომადგენელთა კონგრესზე გადაწყდა, რომ აფხაზური ენის დღე ყოველწლიურად 27 ოქტომბერს იმ ქვეყნებში აღინიშნოს, სადაც აფხაზური დიასპორა ცხოვრობს.
აფხაზური ენა კავკასიურ ენებს მიეკუთვნება, რომლის დამწერლობაც სათავეს 1928 წლიდან იღებს. თავდაპირველად ამისთვის ლათინური, ხოლო შემდეგ ქართული ანბანი გამოიყენებოდა.
1954 წლიდან აფხაზური დამწერლობა კირილიცაზე გადავიდა.