თბილისი, 24 ოქტომბერი – Sputnik. საქართველოს მთავრობა პრემიერის მეთაურობით აცხადებს სრულ მზადყოფნას, განაგრძოს მშვიდობიანი პოლიტიკის ხელშეწყობა რეგიონში, განაცხადა საქართველოს პრემიერ-მინისტრმა ირაკლი ღარიბაშვილმა თბილისში აზერბაიჯანის პრეზიდენტ ილჰამ ალიევთან გამართულ ერთობლივ პრესკონფერენციაზე.
აზერბაიჯანის პრეზიდენტი თბილისს ორშაბათს სამუშაო ვიზიტით ეწვია. ვიზიტის ფარგლებში ღარიბაშვილმა და ალიევმა პირისპირ შეხვედრა გამართეს.
როგორც საქართველოს მთავრობის მეთაურმა პრესკონფერენციაზე განაცხადა, რეგიონსა და მსოფლიოში სწრაფად ცვალებადი და რთული გამოწვევების პირობებში უდიდესი მნიშვნელობა ენიჭება მშვიდობასა და სტაბილურობას, რაც საკვანძო მოცემულობაა რეგიონის განვითარებისა და ჩვენი ხალხების კეთილდღეობისთვის.
„ჩვენ ასევე შევეხეთ რეგიონში არსებულ სიტუაციას, აზერბაიჯანსა და სომხეთს შორის უკანასკნელ პერიოდში მიღწეულ შეთანხმებას მშვიდობიანი პროცესის დაწყების თაობაზე. ეს ჩვენ დიდ იმედს გვაძლევს. საქართველო, პირადად მე და ჩვენი მთავრობა აცხადებს სრულ მზადყოფნას, რომ გავაგრძელოთ და ხელი შევუწყოთ მშვიდობიან პოლიტიკას, რომელიც ჩვენ ერთად დავიწყეთ“, – განაცხადა ღარიბაშვილმა.
ამასთან, პრემიერმა აღნიშნა, რომ მშვიდობიანი სამეზობლოს ინიციატივა არ ეწინააღმდეგება და არ ანაცვლებს თანამშრომლობის სხვა რომელიმე ფორმატს, პირიქით, მას დახმარებას გაუწევს.
„მე მჯერა, რომ ჩვენ ერთად კიდევ ბევრ მნიშვნელოვან საქმეს გავაკეთებთ. ასევე მივესალმები თქვენ მიერ პრაღაში გამოთქმულ ინიციატივას სამხრეთ კავკასიაში ერთობლივი სამმხრივი სადისკუსიო მექანიზმის შექმნის შესახებ“, – მიმართა ალიევს ღარიბაშვილმა.
გასული წლის დეკემბერში ირაკლი ღარიბაშვილი „მშვიდობიანი სამეზობლოს“ ინიციატივით გამოვიდა. მან მეზობელ ქვეყნებს შესთავაზა არაფორმალური დიალოგისთვის რეგიონული პლატფორმის შექმნა, რომელშიც მონაწილეობას მიიღებენ სომხეთი, აზერბაიჯანი და საქართველო.