სასამართლომ ნიკოლოზ ბასილაშვილი უდანაშაულოდ ცნო

„ასევე არის ეპიზოდები, სადაც ისმის ბილწსიტყვაობა, თუმცა ამის საპირწონედ ჩვენ გვქონდა ამავე ვიდეო-აუდიოჩანაწერებში ქრონოლოგიით ნელი დოროყაშვილის ქმედებები. ჩანაწერების მიხედვით, თავად ნელი დოროყაშვილი აყენებდა სიტყვიერ შეურაცხყოფას ნიკოლოზ ბასილაშვილს, იყო დამცირების შემთხვევები და, სამწუხაროდ, იყო უკიდურესად უხამსი სიტყვებით მოხსენიებული“, – აღნიშნა მოსამართლემ.

„დასკვნის თანახმად, ნიკოლოზ ბასილაშვილმა ნელი დოროყაშვილის მხრიდან განიცადა ფსიქოლოგიური ტანჯვა. ამ დასკვნიდან გამომდინარე, ბრალდების ტვირთი ერთგვარად გაიზარდა. ბრალდების მხარეს, ერთი მხრივ, უნდა დაედასტურებინა, რომ ბასილაშვილთან ნამდვილად ჩაიდინა ფსიქოლოგიური ძალადობა და, მეორე მხრივ, ბრალდების მხარეს უნდა გაებათილებინა ის ფსიქოლოგიური ექსპერტიზის დასკვნა, რაც დაცვამ სასამართლოს წარუდგინა. თუმცა გამოკვლეული მტკიცებულებებით ეს ასე არ მოხდა“, – განაცხადა მოსამართლემ.

„დაცვის მხარემ სასამართლო სხდომაზე გამოიკვლია საბანკო ანგარიშსწორება, ამონაწერი ბანკიდან, რომლის მიხედვითაც დასტურდება – არა მხოლოდ აშშ-ში, საქართველოშიც – რომ ამ ამონაწერების მიხედვით არ ფიქსირდება რომელიმე ეტაპზე ბარათის დაბლოკვის ფაქტი. შესაბამისად, სასამართლოს გაუჩნდა მოლოდინი, რომ ბრალდების მხარე წარმოუდგენდა სასამართლოს სხვა მტკიცებულებას, იგივე ბანკიდან გამოთხოვილ ინფორმაციას. თუმცა ამგვარი ინფორმაცია ვერ მივიღეთ“, – განაცხადა ხარჩილავამ.