თბილისი, 21 ოქტომბერი — Sputnik. ევროპაში ბევრი გაოცდება, თუ „ჩრდილოეთის ნაკადებზე“ ტერაქტის შემსრულებლების შესახებ ინფორმაცია გახმაურდება, განაცხადა რუსეთის პრეზიდენტის პრეს-მდივანმა დმიტრი პესკოვმა.
მისი თქმით, მოსკოვი დიპლომატიური არხებით მუშაობს გამოძიებაში დაშვებაზე, მაგრამ წინააღმდეგობის „კედელს აწყდება“, ვინაიდან დასავლეთში არ სურთ ურთიერთქმედება და არ სურთ, რომ „ერთად ჩაწვდნენ სიმართლეს“.
როგორც პესკოვმა განაცხადა, ტერაქტის შემსრულებლებთან დაკავშირებით მოსკოვის ვარაუდები კარგადაა ცნობილი, მაგრამ რაიმე კონკრეტული ცნობების მიღება შეუძლებელია, ვინაიდან გერმანიამ, შვედეთმა და დანიამ უარი თქვეს გამოძიებაში რუსეთის ჩართვაზე.
რუსულ გაზსადენებზე „ჩრდილოეთის ნაკადი-1“ და ჩრდილოეთის ნაკადი-2“ აფეთქება 26 სექტემბერს მოხდა. გერმანია, დანია და შვედეთი არ გამორიცხავენ, რომ მომხდარი მიზანმიმართული დივერსია იყო. კრემლში ინციდენტი საერთაშორის ტერორიზმად შეაფასეს. რუსეთის საგარეო საქმეთა სამინისტროს ოფიციალური წარმომადგენლის მარია ზახაროვას თქმით, აფეთქების ზონაში ნატოს სწავლებები მიმდინარეობდა ღრმაწყლოვანი აღჭურვილობის გამოყენებით. თავის მხრივ, დასავლეთში არ გამორიცხავენ, რომ დივერსიაში თავად რუსეთის ხელი ერიოს.