თბილისი, 20 ოქტომბერი — Sputnik. მმართველ პარტია „ქართული ოცნება - დემოკრატიულ საქართველოში“ ვაკის პარკში მომხდარი ტრაგედიის გამო მათი პარტიიდან არჩეული თბილისის მერის კახა კალაძის გადადგომის აუცილებლობას ვერ ხედავენ.
საქართველოს შსს-მ სამშაბათს განაცხადა, რომ ვაკის პარკის ტრაგედიასთან დაკავშირებით საქმეზე ცხრა ადამიანი დააკავა. შემთხვევა 13 ოქტომბერს მოხდა, როდესაც ბურთის ამოსაღებად შადრევანში ჩასულ სამ მოზარდს დენმა დაარტყა. აქედან ერთი, 13 წლის გოგონა გარდაიცვალა. ინციდენტის გამო ოპოზიცია მოითხოვს, რომ კალაძემ პოლიტიკური პასუხისმგებლობა აიღოს და გადადგეს.
„ამ შემთხვევაში იყო კონკრეტული გადაცდომა, გულგრილობა, რამაც გამოიწვია ტრაგიკული შედეგი, თუმცა რაც შეეხება სისტემურ პრობლემას, ასეთი სისტემური პრობლემა არ ვლინდება. ასეთ პირობებში საუბარი მერის, კახა კალაძის პოლიტიკურ პასუხისმგელობაზე არის ცარიელი სპეკულაცია და აბსოლუტურად უადგილო“, – განაცხადა „ქართული ოცნების“ თავმჯდომარემ ირაკლი კობახიძემ.
კალაძემ ტრაგედიაში ბრალდებულების დაკავების შემდეგ კიდევ ერთხელ განაცხადა, რომ მზადაა პასუხი აგოს კანონის მთელი სიმკაცრით, თუ ვაკის პარკის ტრაგედიაში მისი სულ მცირე ბრალი მაინც გამოიკვეთება.
დაკავებულ ცხრა ადამიანს შორისაა თბილისის მერიის გარემოს დაცვის საქალაქო სამსახურის უფროსის მოადგილე გიორგი ვახტანგაშვილი, რომელსაც ბრალად ედება სამსახურებრივი გულგრილობა, რამაც ადამიანის სიცოცხლის მოსპობა გამოიწვია.
ოთხშაბათს სამსახურის უფროსმა გიგა გიგაშვილმა თანამდებობა დატოვა და განაცხადა, რომ მომხდარზე მორალურ პასუხისმგებლობას გრძნობს.
გუშინ შინაგან საქმეთა სამინისტროს თბილისის პოლიციის დეპარტამენტის დირექტორის მოადგილემ კახა მურადაშვილმა განაცხადა, რომ ვაკის პარკში ტრაგედიის საქმეზე ბრალდებულ პირთა წრე შეიძლება კიდევ გაიზარდოს.
დაკავებულებს ბრალად ედებათ გულგრილობა, რამაც ადამიანის სიცოცხლის მოსპობა გამოიწვია, ყალბი ოფიციალური დოკუმენტის გამოყენება და სამუშაოს წარმოებისას უსაფრთხოების წესის დარღვევა, რამაც ადამიანის სიცოცხლის მოსპობა გამოიწვია.
გამოძიებამ დაადგინა, რომ ორმა შემდუღებელმა დააზიანა ელექტროსადენის იზოლაცია, ხოლო მათ მიერ შესრულებული სამუშაოს ხარისხი არავის შეუმოწმებია.