თბილისი, 13 ოქტომბერი — Sputnik. საქართველოს ყოველთვის ემახსოვრება მერაბ კოსტავას გმირული ცხოვრება, ნათქვამია საქართველოს პრემიერ-მინისტრ ირაკლი ღარიბაშვილის განცხადებაში.
საქართველოს ეროვნულ-განმათავისუფლებელი მოძრაობის ერთ-ერთი გამორჩეული წარმომადგენლის, საქართველოს ეროვნული გმირის მერაბ კოსტავას ტრაგიკული გარდაცვალებიდან 33 წელი გავიდა.
„1989 წლის 13 ოქტომბერს საქართველომ დაკარგა თავისი ერთ-ერთი გამორჩეული შვილი, ნამდვილი ქართული ხასიათის – ღირსების, სიმტკიცისა და სამშობლოსათვის თავდადების განსახიერება. ქედს ვიხრი მისი ნათელი ხსოვნის წინაშე. მერაბ კოსტავას უდიდესი წვლილი საქართველოს დამოუკიდებლობაში, მისი გმირული ცხოვრება მუდამ ემახსოვრებათ ჩვენს ქვეყანაში“, – ნათქვამია ღარიბაშვილის განცხადებაში.
კოსტავა 1989 წლის 13 ოქტომბერს საეჭვო ვითარებაში, სოფელ ბორითთან ავტოკატასტროფაში დაიღუპა.
საბჭოთა პერიოდში საქართველოს დამოუკიდებლობისთვის მებრძოლი ბევრჯერ იყო რეპრესირებული, დაპატიმრებული, გადასახლებული. ბოლოს იგი გადასახლებიდან 1987 წელს დაბრუნდა და სამშობლოს დამოუკიდებლობისთვის ბრძოლა ზვიად გამსახურდიასთან ერთად განაგრძო.
მერაბ კოსტავა თბილისში, მწერალთა და საზოგადო მოღვაწეთა მთაწმინდის პანთეონშია დაკრძალული.