თბილისი, 6 ოქტომბერი — Sputnik. ქართველი ვირტუოზი პიანისტისა და კომპოზიტორის სანდრო ნებიერიძის საავტორო კონცერტი ვანო სარაჯიშვილის სახელობის თბილისის სახელმწიფო კონსერვატორიის მცირე დარბაზში 6 ოქტომბერს გაიმართება.
კონცერტზე ნებიერიძის ნაწარმოებები აჟღერდება.
„ეს იქნება პირველი სრული საავტორო საღამო, რომელზეც მსმენელი მოისმენს სანდრო ნებიერიძის რიგ საპრემიერო ნაწარმოებებს, ასევე მის უკვე ცნობილ კომპოზიციებს", – ნათქვამია ღონისძიების ანონსში.
კონცერტში მონაწილეობას მიიღებს ჩელისტი ლიზი რამიშვილი, ხოლო სპეციალური სტუმრის სტატუსით გამოვა ნატალია ქუთათელაძე, რომელიც შეასრულებს თეატრალურ-მუსიკალურ მინიატურას მეცო-სოპრანოსა და ფორტეპიანოსთვის (გიორგი სარჯველაძის ტექსტის მიხედვით).
სანდრო ნებიერიძე 21 წლისაა. იგი თბილისის ვანო სარაჯიშვილის სახელობის კონსერვატორიასთან არსებული მუსიკალური სემინარიის (პედაგოგი - ლალი სანიკიძე) კურსდამთავრებულია. ფორტეპიანოს პარალელურად იგი მაკა ვირსალაძის კლასში კომპოზიციას ეუფლებოდა.
ნებიერიძე არის ოპერის, საფორტეპიანო და სხვა საკრავებისთვის განკუთვნილი თხზულებების ავტორი, სხვადასხვა საერთაშორისო კონკურსების ლაურეატი, მათ შორის: Musica, Sepashvili Klavierwettbewerb (2009, I პრემია); ვილნიუსში Balys Dvarionas International Piano Competition (ლიეტუვა, 2012), კიევში საერთაშორისო მუსიკალური კონკურს-ფესტივალის (უკრაინა, 2013), Astana Piano Passion (ყაზახეთი, 2015, I პრემია).
პიანისტი გასტროლებს მართავს საქართველოსა და ევროპაში. თავისი გამოსვლების დროს ასრულებს საკუთარ ნაწარმოებებსაც.