თბილისი, 3 ოქტომბერი – Sputnik. პარლამენტის საპროცედურო საკითხთა და წესების კომიტეტმა მმართველი პარტია „ქართული ოცნება - დემოკრატიული საქართველოს“ დეპუტატის თამარ ტალიაშვილისთვის პარლამენტის წევრის უფლებამოსილების ვადამდე შეწყვეტის საკითხზე იმსჯელა. ამის შესახებ ინფორმაციას საქართველოს საკანონმდებლო ორგანო ავრცელებს.
თამარ ტალიაშვილი ევროპის საბჭოში საქართველოს წარმომადგენელი გახდა, რის გამოც დეპუტატის უფლებამოსილება შეუწყდება.
„თამარ ტალიაშვილი ევროპის საბჭოში საქართველოს წარმომადგენლის პოსტზე დაინიშნა, რაც ძალიან მნიშვნელოვანი დიპლომატიური პოზიციაა. ასევე მნიშვნელოვანია ეს საქართველოსთვის ევროინტეგრაციის გზაზე, რომ იქ იყოს ადამიანი, რომელსაც აქვს პროფესიული უნარები“, – განაცხადა კომიტეტის თავმჯდომარემ ირაკლი ქადაგიშვილმა.
საპროცედურო საკითხთა და წესების კომიტეტმა შესაბამისი დადგენილების პროექტი მოამზადა, რომელიც პარლამენტს უახლოეს პლენარულ სხდომაზე წარედგინება.
ევროპის საბჭოში ელჩად დანიშვნის გამო „ქართული ოცნების“ დეპუტატ თამარ ტალიაშვილის ნაცვლად პარლამენტში უმრავლესობის სიით გრეტა წიწავა შევა.
პარლამენტის განათლებისა და მეცნიერების კომიტეტის თავმჯდომარის პირველი მოადგილე, ფრაქცია „ქართული ოცნების“ წევრი თამარ ტალიაშვილი პარლამენტის დეპუტატი 2020 წლის დეკემბრიდან იყო.