თბილისი, 28 სექტემბერი − Sputnik. რუსული გაზსადენებიდან გაზის გაჟონვა აფეთქებების შედეგად მოხდა, განაცხადა შვედეთის საგარეო საქმეთა მინისტრმა ანნ ლინდემ.
„დანიისა და შვედეთის ეკონომიკურ ზონებში გაზსადენ „ჩრდილოეთის ნაკადი-1“-დან და „ჩრდილოეთის ნაკადი-2“-დან გაზის გაჟონვა, დიდი ალბათობით, საბოტაჟური აფეთქებების შედეგად მოხდა. ჩვენ განვაგრძობთ ინფორმაციის მოკრებას და არ გამოვრიცხავთ არანაირ მიზეზს, პირსა თუ მოტივს“, − დაწერა მინისტრმა Twitter-ზე.
მანამდე, ორშაბათს ოპერატორმა კომპანიამ Nord Stream 2 AG გაავრცელა ინფორმაცია, რომ საგანგებო შემთხვევა მოხდა „ჩრდილოეთის ნაკადი-2“-ის ერთ-ერთ ტოტზე, რომელიც ტექნიკური გაზით იყო შევსებული.
ინციდენტი დანიის წყლებში, კუნძულ ბორნჰოლმის მახლობლად დაფიქსირდა, რასაც გაზსადენში წნევის მკვეთრი ვარდნა მოჰყვა. ამის შემდეგ წნევა ასევე მკვეთრად დაეცა „ჩრდილოეთის ნაკადი-1“-ის ორივე ტოტზე.
აშშ-ის, გერმანიისა და პოლონეთის ოფიციალურმა პირებმა არ გამორიცხეს, რომ საბოტაჟი თავად რუსეთის მოწყობილი იყოს. როგორც კრემლის პრეს-მდივანმა დმიტრი პესკოვმა განაცხადა, რუსეთი „უკიდურესად შეშფოთებულია“ გაზსადენებიდან გაჟონვით, რასაც გაზზე ფასების მკვეთრი ზრდა მოჰყვა.