თბილისი, 22 სექტემბერი — Sputnik. საერთაშორისო მნიშვნელობის ხაშური–ახალციხე–ვალეს გზის 53-54 კმ მონაკვეთზე 22-23 სექტემბერს სავალი ნაწილი დროებით შევიწროვდება. ამის შესახებ ინფორმაციას საავტომობილო გზების დეპარტამენტი ავრცელებს.
უწყების ინფორმაციით, აღნიშნული საავტომობილო გზის 53-54 კმ მონაკვეთზე დაგეგმილია ძველი პარაპეტების შეცვლა ახლით. სამუშაოების წარმოების პერიოდში, ავტოტრანსპორტის უსაფრთხო გადაადგილების მიზნით, 22 და 23 სექტემბერს 07:00 სთ-დან 18:00 სთ-მდე პერიოდში სავალი ნაწილი ერთ სამოძრაო ზოლზე 15-20 წუთიანი ინტერვალებით შევიწროვდება.
ერთი პარაპეტის შეცვლის შემდეგ დაგროვილი საავტომობილო ნაკადის გასატარებლად საავტომობილო გზა პერიოდულად გაიხსნება.
სამუშაოებს დეპარტამენტის კონტრაქტორი ორგანიზაცია შპს „ჯავახავტოგზა" ახორციელებს.
ხაშური–ახალციხე–ვალეს საავტომობილო გზით სატრანზიტო ტვირთბრუნვა ხორციელდება და მის გამართულად ფუნქციონირებას ქვეყნისთვის დიდი მნიშვნელობა აქვს სოციალურ-ეკონომიკური თვალსაზრისით.