თბილისი, 31 აგვისტო – Sputnik. სურსათის ეროვნული სააგენტოს ინსპექტორებმა ივლისი–აგვისტოს პერიოდში 10 ათას კილოგრამამდე უვარგისი ხორცი ამოიღეს და გაანადგურეს, განაცხადა სააგენტოს უფროსის მოადგილემ ვასილ ბასილაძემ ჟურნალისტებთან.
მოსახლეობის ჯანმრთელობისა და მომხმარებელთა ინტერესების დაცვის მიზნით სურსათის ეროვნული სააგენტო ყოველდღიურად ახორციელებს სახელმწიფო კონტროლს საქართველოს მთელ ტერიტორიაზე.
გავრცელებული ინფორმაციით, აღნიშნულ პერიოდში შემოწმდა 800-ზე მეტი ბიზნეს-ობიექტი, აქედან 375 ბიზნეს-ოპერატორი სხვადასხვა დარღვევების გამო დაჯარიმდა – დაფიქსირდა სანიტარიულ-ჰიგიენური ნორმების დარღვევა, ვადაგასული ხორცის რეალიზაცია, სასაკლაოს გვერდის ავლით დაკლული ცხოველის ხორცის რეალიზაცია და ა.შ.
„ბოლო ორ თვეში ჯამურად 10 ათას კილოგრამამდე ხორცი ამოვიღეთ. სააგენტოს თანამშრომლებმა გაურკვეველი წარმომავლობის ხორცი კანონმდებლობის შესაბამისად გაანადგურეს. მიუხედავად იმისა, რომ აღნიშნული რიცხვი მაღალია, შეიძლება ვთქვათ, რომ წინა წლებთან შედარებით დადებითი ტენდენცია ნამდვილად შეიმჩნევა“, – განაცხადა ბასილაძემ.
მისი თქმით, მიმდინარე წლის მანძილზე სურსათის ეროვნულმა სააგენტომ ქვეყნის მასშტაბით 2.030 ბიზნეს-ოპერატორი შეამოწმა.
კვლევები ხორცის ხარისხზე საზოგადოებრივი კვების და რეალიზაციის ობიექტებში 2017 წლის მარტიდან ტარდება.