თბილისი, 30 აგვისტო – Sputnik. საქართველოს ტურიზმის ეროვნულმა ადმინისტრაციამ ახალი ტურისტული გზამკვლევები გამოსცა. ამის შესახებ ნათქვამია ადმინისტრაციის მიერ გავრცელებულ ინფორმაციაში.
უწყების ცნობით, შემუშავდა ექვსი მიმართულება, რომლებიც მოიცავენ ინფორმაციას საქართველოს დაცული ტერიტორიების, სამთო კურორტების, კულტურის, ღვინის და კულინარიის შესახებ.
ტურიზმის ეროვნულმა ადმინისტრაციამ ახალი ტურისტული გზამკვლევები გამოსცა
© Georgian National Tourism Administration
„ახალი ბროშურების დახმარებით მოგზაურები UNESCO-ს მსოფლიო მემკვიდრეობის სიაში შესული ძეგლების, მუზეუმების, მონასტრების, იმერეთის ტურისტული ადგილებისა და ქუთაისის საერთაშორისო აეროპორტის შესახებ ცნობებს მიიღებენ“, – ნათქვამია ინფორმაციაში.
ბროშურებში ჩართულია რუკები, მარშრუტები, ინფორმაცია ვიზების შესახებ, ტურისტებისთვის საჭირო ონლაინ-ბმულები და QR-კოდები.
ახალი ტურისტული გზამკვლევები ინგლისურ ენაზე გამოიცა. ამასთან, დაგეგმილია ბროშურების თარგმნა მიზნობრივი ბაზრებისთვის სხვადასხვა ენაზე.
ახალ გზამკვლევებს ტურისტები საინფორმაციო ტურისტულ ცენტრებში გაეცნობიან. ამას გარდა, ახალი ბროშურებით ტურიზმის ეროვნული ადმინისტრაცია საერთაშორისო ტურისტულ გამოფენებზე წარდგება.
ახალი ტურისტული ბროშურები ტურიზმის ეროვნულმა ადმინისტრაციამ მთის ტრასების სააგენტოსთან, ქუთაისის აეროპორტთან, საქართველოს ეროვნულ პარკებთან და საქართველოს კულტურული მემკვიდრეობის დაცვის ეროვნულ სააგენტოსთან თანამშრომლობით მოამზადა.