თბილისი, 22 აგვისტო – Sputnik. ბორჯომის მუნიციპალიტეტში დასახლებულ პუნქტებზე ხანძრის გავრცელების საშიშროება ამ დროისათვის მოხსნილია. ამის შესახებ ინფორმაციას საგანგებო სიტუაციების მართვის სამსახური ავრცელებს.
ამჟამად ბორჯომის მუნიციპალიტეტი კვლავ სტიქიის ზონაა. ცეცხლის ჩაქრობას, რთულ რელიეფთან ერთად, ქარიც ართულებს.
უწყების ცნობით, ხანძრის ქრობა დილიდან განაახლეს სასაზღვრო პოლიციის ვერტმფრენებმა. ასევე ადგილზე მობილიზებულია სახანძრო-სამაშველო ავტოტექნიკა.
„ხანძრის ქრობის სამუშაოები მთელი ღამის განმავლობაში მიმდინარეობდა. ამ დროისათვის ხანძრის ქრობის ღონისძიებებში ჩართულია 300 მეხანძრე-მაშველი და განსაკუთრებულ დავალებათა დეპარტამენტის 300 თანამშრომელი“, – აღნიშნულია განცხადებაში.
ადგილზე იმყოფებიან შინაგან საქმეთა სამინისტროს სხვადასხვა დანაყოფის წარმომადგენლები, ასევე თავდაცვის სამინისტროს პირადი შემადგენლობა, ეროვნული სატყეო სააგენტოსა და ადგილობრივი მუნიციპალიტეტის წარმომადგენლები.
როგორც ბორჯომის მუნიციპალიტეტის მერმა ოთარ არბოლიშვილმა განაცხადა, ადგილზე მობილიზებულია ყველა შესაბამისი სამსახური, რათა ხანძრის კერების სწრაფად ლოკალიზება მოხდეს. მერის ინფორმაციით, ტყის ხანძრის ქრობის პროცესში კიდევ ერთი ვერტმფრენი ჩაერთვება.
„სიტუაციას ის გარემოება ართულებს, რომ არის მაღალი ტემპერატურა, სრულიად არის გამომშრალი ნიადაგი ტყეში და ხდება სწრაფი აალება და ხანძრის კერების სწრაფი გავრცელება. მუშაობს სამი ვერტმფრენი, ერთიც დაემატება და მაქსიმალური ჩართულობაა იმისთვის, რომ ხანძრის კერები ლოკალიზებული იყოს“, – განაცხადა არბოლიშვილმა.
ხანძრის რამდენიმე კერა სოფელ ქვაბისხევის ტყეში, მტკვრის მარჯვენა ნაპირზე 20 აგვისტოს გაჩნდა. წინასწარი ინფორმაციით, ცეცხლი სამ ჰექტარზე გავრცელდა.