თბილისი, 15 აგვისტო – Sputnik. საქართველოს იუსტიციის სამინისტროს სპეციალური პენიტენციური სამსახური დეზინფორმაციას უწოდებს სატელევიზიო სიუჟეტს იმის შესახებ, რომ გარდაბნის №6 მკაცრი რეჟიმის ციხეში დაახლოებით ათი პატიმარი შიმშილობს და საპატიმროს მედპერსონალი მათ სათანადო ყურადღებას არ აქცევს.
ამავე სიუჟეტში, რომელიც ოპოზიციური ტელეკომპანია „TV პირველის“ ეთერში გავიდა, ნათქვამი იყო, რომ პატიმრებს, თუ ციხეში პირობების გამო პროტესტს გამოთქვამდნენ, უკანონოდ უწესებდნენ შეზღუდვებს – უკრძალავდნენ სატელეფონო ზარებს და პაემნებს ნათესავებთან.
პენიტენციურმა სამსახურმა შიმშილობის ფაქტი დაადასტურა, მაგრამ დააზუსტა, რომ პროტესტის უკიდურეს ფორმას მხოლოდ სამმა ადამიანმა მიმართა.
„აღსანიშნავია, რომ ორმა მათგანმა შიმშილობა გამოაცხადა მხოლოდ 14 აგვისტოს, აღნიშნული მედიასაშუალების სიუჟეტის ეთერში გასვლის შემდეგ. რაც შეეხება მსჯავრდებულთა სამედიცინო მომსახურებას, ყველა პენიტენციურ დაწესებულებაში მედიკოსები მუშაობენ 24-საათიან რეჟიმში და ნებისმიერ ბრალდებულს/მსჯავრდებულს მოთხოვნისთანავე აწვდიან სრულყოფილ სამედიცინო მომსახურებას“, – ნათქვამია განცხადებაში.
რაც შეეხება გიორგი ჭელიძეს, რომელზეც სიუჟეტში იყო საუბარი, №6 ციხეში მოხვედრის შემდეგ მას ჩაუტარდა მრავალმხრივი მკურნალობა და არაერთხელ გაეწია სხვადასხვა პროფილის ექიმის კონსულტაცია. ჭელიძის ჯანმრთელობის მდგომარეობა 11 და 12 აგვისტოს შეამოწმეს ოჯახის ექიმებმა და მას არანაირი ჩივილი არ ჰქონია, აღნიშნულია განცხადებაში.
ამავე დროს პენიტენციურმა სამსახურმა აღნიშნა, რომ ციხის ადმინისტრაცია დისციპლინურ სასჯელს პატიმრის მიერ დისციპლინის დარღვევის შემთხვევაში მხოლოდ კანონის სრული დაცვით მიმართავს.
უწყების ინფორმაციით, ჭელიძემ არაერთხელ დაარღვია დისციპლინა და მის მიმართ რამდენჯერმე გამოიყენეს დისციპლინური სასჯელი.
სპეციალური პენიტენციური სამსახური მოუწოდებს მასმედიას, თავი შეიკავონ შეუმოწმებელი მონაცემების გავრცელებისგან, რაც, პირველ რიგში, აზიანებს პატიმრებისა და მათი ოჯახების ინტერესებს, საზოგადოება შეჰყავს შეცდომაში, აზარალებს უწყების იმიჯს და მისი თანამშრომლების დისკრედიტაციას ემსახურება, ნათქვამია განცხადებაში.