თბილისი, 12 აგვისტო — Sputnik. ჰარვარდის უნივერსიტეტი ქართული ენის შესწავლის მსურველებისთვის კურსებს ხსნის. ინფორმაციას ამის შესახებ ქართველი ემიგრანტი მზია შანავა ავრცელებს.
„ქართველი ენათმეცნიერების და მეცნიერების თაობების ოცნება ასრულდა – ჰარვარდის უნივერსიტეტი იწყებს ქართულის სწავლების პროგრამას და ქართული ენის კლასებს გთავაზობთ", – დაწერა შანავამ.
ჰარვარდის უნივერსიტეტის ვებ-გვერდზე ნათქვამია, რომ უმაღლესი სასწავლებელი იძლევა საშუალებას, მსურველებმა, სხვა ენებთან ერთად, შეისწავლონ კავკასიისა და ცენტრალური აზიის ენები (მაგ. ქართული, ყაზახური, უზბეკური და ა.შ.).
უნივერსიტეტის ადმინისტრაცია ამ ენების შესწავლით დაინტერესებულ პირებს სთხოვს, დაუკავშირდნენ დოქტორ სტივენ კლენსის.
Harvard University აშშ-ის უძველესი უნივერსიტეტია, რომელიც 1636 წელს დაარსდა. სახელი სამღვდელო პირის ჯონ ჰარვარდის პატივსაცემად ეწოდა, რომელმაც უნივერსიტეტს თავისი ქონების ნახევარი და დიდი ბიბლიოთეკა დაუტოვა.