მსახიობი მაკა შალიკაშვილი თავს იღბლიან ადამიანად მიიჩნევს და აცხადებს, რომ აუცილებელია მშობელმა ბავშვს მუდმივად შთააგონოს, რომ საუკეთესოა. მსახიობი მშობლებს საკუთარ ცხოვრებისეულ გამოცდილებას უზიარებს.
როგორც ინტერვიუში ამბობს, საკუთარ თავს ძალიან იღბლიან ადამიანად თვლის და უნდა ყველა მშობლის საყურადღებოდ თქვას, რომ ირგვლივ მყოფებს და, პირველ რიგში, მშობლებს ბავშვის ცხოვრებაში ლომის წილი აქვთ ყველანაირი თვალსაზრისით.
„მაგალითად, ჩემს მშობლებს უდიდესი წვლილი მიუძღვით ჩემ იღბლიანობაში. სიტყვას ძალიან დიდი ძალა აქვს, ეს ყველამ ვიცით. ძალიან პატარა ვიყავი, როცა ჩემზე ამბობდნენ – „ო, მაკა როგორი იღბლიანია“, „მაკას საოცარი იღბალი აქვს, სულ იგებს“. თამაში იქნება, სწავლა თუ რამე ელემენტარულის გაკეთება, ყველაფერთან მიმართებაში ეს სიტყვები მესმოდა. „დედა, ეს რომ გაიზრდება, ისეთი იქნება, ქვაზე რომ დასვა, იცხოვრებს“ და ა.შ. მოკლედ, ჩემ შესახებ სულ მესმოდა „ჩვენი იღბლიანი გოგო“ და მართლა იღბლიანი აღმოვჩნდი. ყოველთვის და ყველგან საინტერესო ხალხსა და სიტუაციებში ვხვდებოდი. მაგალითად, ავტობუსში რომ ავდიოდი, აუცილებლად მძღოლთან ჩამომიყალიბდებოდა ძალიან კარგი დამოკიდებულება“, – ამბობს მსახიობი ჟურნალ „თბილისელებთან“.