თბილისი, 5 აგვისტო – Sputnik. სოჭში რუსეთისა და თურქეთის პრეზიდენტების ვლადიმირ პუტინისა და რეჯეფ თაიიფ ერდოღანის მოლაპარაკებები დასრულდა.
„მოლაპარაკებები ოთხ საათზე მეტხანს გაგრძელდა. შედეგად მიღებულ იქნა ერთობლივი განცხადება“, – აღნიშნა რუსეთის პრეზიდენტის პრეს-მდივანმა დმიტრი პესკოვმა.
შეხვედრის დასაწყისში რუსეთის ლიდერმა „თურქულ ნაკადს“ რუსული გაზით ევროპის მომარაგების ერთ-ერთი უმნიშვნელოვანესი არტერია უწოდა, რისთვისაც პარტნიორები რეგიონში ანკარის მადლიერი უნდა იყვნენ.
ვლადიმირ პუტინმა თურქ კოლეგასთან შეხვედრაზე მიუთითა რუსეთ-თურქეთის ტვირთბრუნვის ზრდაზე მიმდინარე წლის ხუთ თვეში.
„საკმარისია ითქვას, რომ შარშან ტვირთბრუნვა 57%-ით გაიზარდა. მიმდინარე წლის პირველ ხუთ თვეში კი, მაისის ჩათვლით, ის ორჯერ გაიზარდა“, – აღნიშნა რუსეთის პრეზიდენტმა.
პუტინმა ორ ქვეყანას შორის ურთიერთქმედების მიმართულებათა სიმრავლეზე ისაუბრა.
„გვაქვს მსხვილი პროექტები. ყველამ იცის ატომური ელექტროსადგური „აკუიუს“ მშენებლობის შესახებ. მაგრამ არის სხვა მიმართულებებიც“, – დასძინა რუსეთის ლიდერმა.
თავის მხრივ, რეჯეფ თაიიფ ერდოღანმა შეხვედრაზე ისაუბრა ანკარის გეგმებზე, გადაშალოს ახალი გვერდი ორმხრივ ურთიერთობებში.