გიორგი ნაზღაიძეს თამამად შეიძლება ვუწოდოთ პირველი რეალითი ვარსკვლავი. ბოლო 20 წელიწადში მან სამ რეალითი შოუში მიიღო მონაწილეობა. ესენი იყო „მდიდრები და ღარიბები“, „მზის სახლი“ და ახლა ის უკვე „პრაიმ ჰაუსის“ ყველაზე სკანდალური და ამავდროულად რეიტინგული მონაწილე და გამარჯვებულია.
36 წლის გიორგის მთავარი მიზანია ამ პროექტში მოგებული თანხით შვილის დაბრუნების რთული პროცესი დაიწყოს. ბავშვი, რომელსაც გიორგი საკუთარ შვილად მიიჩნევს, 12 წლისაა და ამერიკაში ცხოვრობს. გიორგის უნდა ამერიკაში ჩავიდეს და სასამართლოთი დაამტკიცოს, რომ ის მისი შვილია.
როგორც ნაზღაიძე ჟურნალ „სარკეს“ უყვება, მისი ერთ-ერთი ყველაზე დიდი შეცდომა ისაა, რომ შვილი გვერდით არ ჰყავს.
„მყავდა საცოლე, რომელთანაც რამდენიმეწლიანი ბედნიერი ურთიერთობა მაკავშირებდა. ჩვენი დაშორების შემდეგ მაშინვე წავიდა ამერიკაში და იქიდან სხვებმა მომილოცეს, მამა გახდიო. როცა შევეცადე გარკვევა, ყოფილი საცოლისგან, რომელიც უკვე გათხოვილი იყო, საშინელი აგრესია წამოვიდა, დაგვანებე თავი, ბავშვი შენი არ არისო. დნმ-ის ანალიზიც მოვითხოვე, მაგრამ მუქარები წამოვიდა. ბავშვის სურათებს დღემდე არ დებენ სოცქსელებში“, – ამბობს ნაზღაიძე.