ბორჯომში „კავალერიის შენობა“ რესტავრაციის შემდეგ ულამაზეს მუზეუმად იქცა - ფოტოები

თბილისი, 20 ივლისი – Sputnik. ბორჯომის „კავალერიის შენობა“, რომელიც მე-19 საუკუნეში აიგო, კაპიტალური აღდგენითი სამუშაოების შემდეგ ადაპტირებულია მუზეუმად და მალე სტუმრებს მიიღებს, ნათქვამია საქართველოს რეგიონული განვითარებისა და ინფრასტრუქტურის სამინისტროს განცხადებაში.

გოთიკური სტილის „კავალერიის შენობა“ კულტურული მემკვიდრეობის ძეგლია და ის არქიტექტორმა ალბერტ ზალცმანმა ააშენა.

შენობა ბუნებრივი ქვის, აგურისა და ხისგან არის აშენებული. აღდგენამდე ის ძლიერ იყო დაზიანებული. შენობის უკანა ნაწილი ნაწილობრივ, სართულშუა გადახურვები და ინტერიერი კი სრულად იყო განადგურებული.

„შენობა შეიძენს ახალ ფუნქციას, რითაც თამამად უპასუხებს საზოგადოებრივად საინტერესო სამუზეუმო-საგამოფენო სივრცის მოთხოვნებს, ხოლო ბორჯომელებისა და დამსვენებლებისთვის გაჩნდება კიდევ ერთი საინტერესო ახალი მიზიდულობის ცენტრი“, – განაცხადა ინფრასტრუქტურის მინისტრმა ირაკლი ქარსელაძემ აღდგენილი შენობის დათვალიერების შემდეგ.

უწყების პრეს-ცენტრის ინფორმაციით, შენობა აუთენტურობის სრული დაცვით აღადგინეს. ახლა იქ მოწყობილია საგამოფენო დარბაზები, სადაც განთავსდება ბორჯომის სამხარეო მუზეუმში დაცული ექსპონატების ნაწილი.

აღდგენის პროექტი განახორციელა რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა მსოფლიო ბანკის ფინანსური მხარდაჭერით. პროექტზე 2,8 მლნ ლარზე მეტი დაიხარჯა.

ირაკლი ქარსელაძე ასევე გაეცნო „კავალერიის შენობის“ მიმდებარედ მერაბ კოსტავას სახელობის პარკის აღდგენის სამუშაოებს. პროექტს ახორციელებს ბორჯომის მუნიციპალიტეტი „განახლებული რეგიონების“ პროგრამით მიღებული თანხებით.

სამუშაოები ითვალისწინებს საბავშვო მოედნების, ამფითეატრის, შადრევნის, საფეხმავლო ბილიკებისა და სხვა აუცილებელი ინფრასტრუქტურის მოწყობას.