მომღერალი მერაბ სეფაშვილი ჟურნალ „თბილისელებთან“ ჯანმრთელობის მდგომარეობასთან დაკავშირებით საუბრობს. ცოტა ხნის წინ მომღერალს ფილტვებთან დაკავშირებით პრობლემები შეექმნა და ლევან რატიანის მეთვალყურეობის ქვეშ კლინიკაში იწვა.
„საბედნიეროდ, უკეთ ვარ, ბევრად უკეთ, მაგრამ ჯერჯერობით მკურნალობას მაინც ვაგრძელებ, იმიტომ რომ სერიოზული ანთება მქონდა ორივე ფილტვში. მდგომარეობა საკმაოდ რთული იყო, მაგრამ, მადლობა ღმერთს, გავუმკლავდით“, – ამბობს მომღერალი.
მერაბ სეფაშვილის თქმით, არანაირი სიმპტომი არ ჰქონია, არც გაციებული იყო, არც ახველებდა, ღამით უცებ აუწია სიცხემ. ძალიან მაღალი ტემპერატურა ჰქონდა ერთი დღე და რომ არ დაიწია, მერე უკვე ლევან რატიანთან მოხვდა.
„ლევანი ჩემი მეგობარია. გადამიღეს და ორმხრივი პნევმონია დამიდგინდა. მოკლედ რომ ვთქვათ, დროულად მივედი. საკმაოდ კრიტიკული მდგომარეობა იყო და მაშინვე მკურნალობა დავიწყეთ. კიდევ კარგი, მივედი, თორემ მერე რა მოხდებოდა, არ ვიცი. ამ ამბავს კარგი არაფერი მოჰყვებოდა, ეს ნამდვილად ვიცი“, – ამბობს სეფაშვილი.