თბილისი, 30 ივნისი — Sputnik. საქართველოს პრემიერ-მინისტრმა ირაკლი ღარიბაშვილმა ევროპული საბჭოს პრეზიდენტს შარლ მიშელს პირობა მისცა, რომ ევროკავშირში წევრობის კანდიდატის სტატუსის მისაღებად ხელისუფლება ყველაფერს გააკეთებს.
ღარიბაშვილსა და მიშელს შორის შეხვედრა საქართველოს პრემიერის მადრიდში ვიზიტის ფარგლებში გაიმართა. მთავრობის პრეს-სამსახურის ცნობით, როგორც შეხვედრაზე ღარიბაშვილმა აღნიშნა, საქართველოსთვის ევროპული პერსპექტივის მინიჭება ისტორიული გადაწყვეტილებაა.
ამით ევროპულმა საბჭომ და ევროკავშირის წევრი ქვეყნების ლიდერებმა დაადასტურეს, რომ საქართველოს მომავალი ევროკავშირშია, განაცხადა ღარიბაშვილმა.
„საქართველოსთვის ევროპული პერსპექტივის მინიჭების შესახებ მიღებული გადაწყვეტილების შემდეგ მჭიდროდ ვიმუშავებთ ევროკავშირის კანდიდატობის გზაზე საქართველოს დასაწინაურებლად. შეხვედრაზე კვლავ აღვნიშნე საქართველოს მთავრობის მიერ ნაკისრი ევროკომისიის მიერ განსაზღვრული ყველა პრიორიტეტული მიმართულებით დაუღალავი მუშაობის ვალდებულება“, – დაწერა ღარიბაშვილმა „ტვიტერზე“.
საქართველოს პრემიერთან გამართულ შეხვედრას სოციალურ ქსელში გამოეხმაურა შარლ მიშელიც.
„გასულ კვირაში ევროკავშირის საბჭომ გადაწყვიტა საქართველოს ევროკავშირში წევრობის პერსპექტივის საკითხი. ჩვენ ვიღებთ ვალდებულებას შემდგომ მხარდაჭერაზე, რათა ეს პროცესი წინ წავწიოთ ესოდენ აუცილებელი რეფორმების განსახორციელებლად“, – დაწერა მიშელმა.
ევროკავშირის საბჭომ საქართველოსთვის ევროპული პერსპექტივის მინიჭების გადაწყვეტილება მიიღო და მზადყოფნა გამოთქვა მიანიჭოს ქვეყანას კანდიდატის სტატუსი, თუ დასახული პრიორიტეტები შესრულდება.
ევროკომისიამ საქართველოსთვის 12 პირობა დაასახელა და აღნიშნა, რომ მხოლოდ მათი შესრულების შემთხვევაში მიენიჭება ქვეყანას ევროკავშირის წევრობის კანდიდატის სტატუსი. ამ პირობებს შორისაა პოლარიზაციის პრობლემის გადაჭრა საზოგადოებაში, დეოლიგარქიზაცია, მედიაგარემოს გაუმჯობესება, სასამართლო სისტემის სრული დამოუკიდებლობის უზრუნველყოფა და ა.შ.
როგორც ევროკომისიაში განმარტეს, ისინი ქვეყანაში მიმდინარე პროცესებს დააკვირდებიან და 2022 წლის ბოლოს ანგარიშს მოამზადებენ.