მსახიობი ბენ აფლეკი 10 წლის ვაჟთან სამუელთან და ჯენიფერ ლოპესთან ერთად ძვირადღირებული მანქანების გაქირავების კომპანიაში იმყოფებოდა, რა დროსაც ინციდენტი მოხდა.
ყვითელი „ლამბორჯინის“ საჭესთან აფლეკის ათი წლის შვილი დაჯდა და ის სხვა მანქანას შეეჯახა. ბენმა ვაჟს ნება დართო ძვირადღირებული მანქანის საჭესთან დამჯდარიყო.
„ლამბორჯინი ურუსის“ ფასი 230.000 დოლარიდან იწყება, ხოლო გასაქირავებელი დღიური ფასი 1.500 დოლარია. როგორც გავრცელებული ვიდეოდან ჩანს, მანქანა თეთრ BMW-ს დაეჯახა. ინციდენტის შემდეგ ბენ აფლეკმა შვილი ანუგეშა და დაამშვიდა.
აფლეკის წარმომადგენელმა საინფორმაციო სააგენტო TMZ-ს განუცხადა, რომ ავტომობილები არ დაზიანებულა.
„არავინ დაშავებულა და ყველა და ყველაფერი კარგადაა. ისინი კმაყოფილები ჩანდნენ და მანქანების თვალიერება ბედნიერად განაგრძეს. ჩვენი კომპანიისთვის პატივი იქნება, თუ ვარსკვლავები კიდევ გვეწვევიან“, – თქვა, თავის მხრივ, გაქირავების კომპანიის წარმომადგენელმა.
ოსკარის მფლობელ ბენ აფლეკს ყოფილ მეუღლე ჯენიფერ გარნერთან სამი საერთო შვილი ჰყავს, 10 წლის სამუელის გარდა, მათ კიდევ ორი - 13 და 16 წლის ქალიშვილები ჰყავთ, სერაფინა და ვაიოლეტი.