თბილისი, 20 ივნისი – Sputnik. შინაგან საქმეთა სამინისტრომ სანზონაში ექიმ-თერაპევტის ბინიდან უცნობი წარმომავლობის გახრწნილი ხორცის ამოღების საქმეზე გამოძიება სისხლის სამართლის კოდექსის 135-ე მუხლით დაიწყო, რაც სისხლით ან სისხლის კომპონენტებით უკანონო ვაჭრობას გულისხმობს.
პოლიცია სანზონაში მრავალბინიანი კორპუსის მობინადრეებმა გაუსაძლისი სუნის გამო გამოიძახეს, რომელიც რამდენიმე თვის განმავლობაში აწუხებდათ. მოქმედი ექიმ-თერაპევტის ბინაში პოლიციას დახვდა დიდი რაოდენობით გახრწნილი ხორცი, ფეკალიებით და სისხლის მაგვარი სითხით სავსე კონტეინერები.
სამინისტროს ინფორმაციით, ექიმ-თერაპევტის ბინიდან ამოღებული ხორცის ნიმუშების ექსპერტიზა გრძელდება.
მასმედიის ინფორმაციით, ქალი, რომლის ბინაშიც დიდი რაოდენობით გახრწნილი ხორცი იპოვეს, მუხიანში ერთ-ერთ კლინიკაში ახლაც მუშაობს.
ქალს პოლიციისთვის უთქვამს, რომ ხორცი გაუფუჭდა, რადგან მაცივარი არ მუშაობდა, ხოლო გახრწნილი ხორცის გადაყრა ვერ მოახერხა, რადგან კანალიზაცია გაჭედილი აქვს.
მასმედიაში არ გამორიცხავენ, რომ საქმე გვქონდეს კანიბალიზმის შემთხვევასთან.