თბილისი, 16 ივნისი – Sputnik. ქართველი ჯაზ-მუსიკოსების რიგით მესამე ფესტივალი „ზაფხულის ღამის ჯაზი“ თბილისში 17–19 ივნისს გაიმართება, ნათქვამია ორგანიზატორების მიერ გავრცელებულ განცხადებაში.
ფესტივალში მონაწილეობას მიიღებს საქართველოსა და მსოფლიოში აღიარებული 100-მდე ქართველი მუსიკოსი. ღონისძიებები გაიმართება არტოს ბაღში (დავით აღმაშენებლის გამზირი, 103), დასაწყისი 19:00 საათი.
ფესტივალის სტუმრებს შესაძლებლობა ექნებათ მოუსმინონ სხვადასხვა არტისტებისა და ბენდების პერფორმანსებს. მსმენელის წინაშე წარდგებიან მაია ბარათაშვილი და ჯაზ-ტრიო, გიგი ცინცაძის ტრიო, რეზო კიკნაძე და Rooftop Underground, დინი ვირსალაძის კვარტეტი, პაპუნა შარიქაძე, ლაშა დეისაძე და სხვები.
ფესტივალი თბილისის მერიის პატრონაჟით იმართება. ღონისძიების ორგანიზატორია მუსიკოსების კავშირი ZMG-ART.