თბილისი, 7 ივნისი — Sputnik. თბილისში Dédicace Gallery-ში 7 ივნისს ცნობილი ქართველი მხატვრის გიორგი გაგოშიძის, იგივე გაგოშას (Gagosh) მულტიმედიური გამოფენა „შუქნიშნები" იხსნება.
„გაგოშას" ნამუშევარი
© Courtesy of Gagosh
„სამშაბათს ჩემი გამოფენა „შუქნიშნები", რომელზეც დიდი ხანი ვმუშაობდი და პირველი ინტერაქტიული, მულტიმედია სერიაა, იხსნება „დედიკას" გალერეაში, 7 საათზე. გამოფენა გაგრძელდება 19 ივნისამდე. დათვალიერების გარდა, თქვენც შეგიძლიათ გახდეთ ამ ინტერაქციის მონაწილე და შუქნიშნებს თქვენ უკარნახოთ მოქმედება", – დაწერა ავტორმა.
შუქნიშნები, როგორც გამოფენის მთავარი კონცეფცია – ესაა მართვის სისტემური მოდელი, რომელიც გარკვეული ქმედებების ნებას გვართმევს, გვიკრძალავს ან უპასუხოდაც გვტოვებს, აღნიშნავენ გალერეაში.
„გაგოშას" ნამუშევარი
© Courtesy of Gagosh
„ამ სისტემის შესაბამისად, ადამიანები სამ კატეგორიად იყოფიან: პირველი, რომლებსაც უწევთ შუქნიშნის კანონებს დაემორჩილონ, მეორე, ვინც ადგენს აღნიშნულ წესებს და, მესამე, ადამიანები, რომლებიც არ ემორჩილებიან სისტემურ გადაწყვეტილებებს. მათ შეუძლიათ სისტემასთან ინტერაქცია, გადაწყვეტილებების მოულოდნელად შეცვლა და თავისი წესების შექმნა", – აღნიშნულია გალერეის ანონსში.
ეს სერია იმის საშუალებას აძლევს დამთვალიერებელს, რომ თავად განსაზღვროს, რომელი კატეგორიის ადამიანია, დასძენენ გამოფენის ორგანიზატორები.