თბილისი, 6 ივნისი – Sputnik. ბრიტანეთის პარლამენტში პრემიერ-მინისტრ ბორის ჯონსონის წინააღმდეგ უნდობლობის ვოტუმის პროცედურა შესაძლოა დღის ბოლომდე ამოქმედდეს, იუწყება ტელეარხი ITV.
გავრცელებული ცნობით, პროცედურის დაწყების შესახებ განცხადებას კონსერვატიული პარტიის წევრთა კომიტეტის (1922 წლის კომიტეტი − აერთიანებს კონსერვატორებს, რომლებიც მთავრობაში არ შედიან) თავმჯდომარე სერ გრემ ბრედი გააკეთებს, რის შემდეგაც რამდენიმე დღის განმავლობაში კონსერვატორი დეპუტატების ფარული კენჭისყრა გაიმართება.
პრემიერ-მინისტრ ჯონსონისთვის უნდობლობის გამოსაცხადებლად საჭიროა კონსერვატიული პარტიის დეპუტატების, სულ მცირე, 54 ხმა.
სულ რამდენი დეპუტატის წერილია შესული პარლამენტში უნდობლობის ვოტუმის კენჭისყრაში მონაწილეობის მოთხოვნით, ჯერჯერობით მხოლოდ სერ ბრედიმ იცის. თუმცა გასული კვირის ბოლოს 25-მა კონსერვატორმა დეპუტატმა ღიად განაცხადა, რომ წერილები უკვე გაგზავნილი აქვთ.
ბრიტანელი დეპუტატების უკმაყოფილება გამოიწვია პანდემიის დროს დაუნინგ-სტრიტზე გამართულმა მრავალრიცხოვანმა წვეულებებმა, მათ შორის, მკაცრი შეზღუდვების პერიოდში. ამ წვეულებათაგან რამდენიმეში ბორის ჯონსონმაც მიიღო მონაწილეობა. მაშინ ბრიტანელების ნახევარზე მეტმა მხარი დაუჭირა პრემიერ-მინისტრის თანამდებობიდან გადადგომას. მოქმედი წესების მიხედვით, უნდობლობის გამოცხადების ინიციატორი მხოლოდ 1922 წლის კომიტეტი შეიძლება იყოს.