თბილისი, 2 ივნისი – Sputnik. მეხანძრეებმა შეძლეს თბილისში, ისნის რაიონში მეორადი ავტონაწილების ბაზრობაზე გაჩენილი ხანძრის ლოკალიზება, განუცხადეს Sputnik–საქართველოს საგანგებო სიტუაციების მართვის პრეს-სამსახურში.
ცეცხლი ბაზრობაზე დღეს, დღისით გაჩნდა. ცეცხლის გაჩენის მიზეზი ჯერჯერობით უცნობია.
„ხანძრის ლოკალიზება რამდენიმე წუთის წინ მოხერხდა. მიმდინარეობს სალიკვიდაციო სამუშაოები. ადგილზე ათი სახანძრო ეკიპაჟი მუშაობს", – განაცხადეს საგანგებო სიტუაციების პრეს-სამსახურში.
ამ დროისთვის ინფორმაცია დაშავებულების შესახებ არ ვრცელდება. ასევე უცნობია, რა ფართობი მოიცვა ხანძარმა.
შემთხვევის ადგილზე მობილიზებული არიან სასწრაფო სამედიცინო დახმარების ბრიგადებიც.
ცეცხლის ჩაქრობა ძლიერი კვამლის გამო გართულებულია – იწვოდა მეორადი საბურავები.