თბილისი, 31 მაისი – Sputnik. მსოფლიო ბანკი საქართველოს ეკონომიკური ზრდის პროგნოზს 2,5%-დან 5,5%-მდე გაზრდის, განაცხადა სამხრეთ კავკასიაში მსოფლიო ბანკის რეგიონულმა დირექტორმა სებასტიან მოლინეუსმა.
მსოფლიო ბანკმა აპრილში საქართველოს ეკონომიკის ზრდის პროგნოზი 5,5%-დან 2,5%-მდე შეამცირა.
„ამის მიზეზი იყო ძალიან დიდი გაურკვევლობა უკრაინის ომის გათვალისწინებით. ასევე მნიშვნელოვანია რუსეთის წინააღმდეგ სანქციების ეფექტი და ამ სანქციების გავლენა საქართველოს ეკონომიკაზე სხვადასხვა მხრიდან, მათ შორის გადმორიცხვების, მაღალი ინფლაციის და ვაჭრობისთვის მიყენებული შოკის ჩათვლით“, – განაცხადა სებასტიან მოლინეუსმა.
მაგრამ, მისი თქმით, საქართველოს ეკონომიკამ შეუდარებელი მდგრადობა აჩვენა.
„ამიტომაც ჩვენ ახლა გადავხედავთ საქართველოს ეკონომიკურ ზრდას და ამჟამად მივიჩნევთ, რომ საქართველოს ეკონომიკა მართლაც გაიზრდება იმ 5,5%-ით, რაც იყო წლის დასაწყისში ნავარაუდევი”, – განაცხადა სებასტიან მოლინეუსმა.
თავის მხრივ, საქართველოს მთავრობამ განაცხადა, რომ არ აპირებს 2022 წელს ეკონომიკის ზრდის 6%-იანი პროგნოზის გადახედვას.
ეკონომიკის მინისტრის ლევან დავითაშვილის განცხადებით, ქვეყნის ეკონომიკაში დადებით ტენდენციებს ადასტურებს პირველ კვარტალში მაღალი ეკონომიკური ზრდა, ექსპორტის ზრდა, ტურიზმიდან შემოსავლების აღდგენა, სატვირთო გადაზიდვების ზრდა და სხვა ფაქტორები.
სტატისტიკის მიხედვით, 2022 წლის მარტში მშპ-ის რეალური ზრდა 2021 წლის ანალოგიურ პერიოდთან შედარებით 10,6%-ს გაუტოლდა, ხოლო პირველი კვარტლის საშუალო მაჩვენებელი 14,4%-ს.