თბილისი, 29 მაისი - Sputnik. რუსთავის მერიისა და მეწარმეთა გაერთიანება STALL-ის ორგანიზებით, რუსთავში პირველი „ქუჩის ბაზარი“ მოეწყო. ამის შესახებ ინფორმაციას ქალაქის მერიის ადმინისტრაცია ავრცელებს.
უწყების ინფორმაციით, 28 და 29 მაისს ახალგაზრდობის პარკში 30 პავილიონში საკუთარი ნაწარმის წარმოდგენისა და რეალიზაციის შესაძლებლობა აქვს ადგილობრივ მცირე და საშუალო მეწარმეებს, ასევე სტარტაპერებს.
„მცირე და საშუალო ბიზნესის, ასევე მათი მხრიდან, ვინც ახლახან დაიწყო და სტარტაპის პროცესშია, იყო შემოთავაზება, თხოვნა, რომ მუნიციპალიტეტს მათთვის გარკვეული სივრცე მოგვენახა, სადაც საკუთარი პროდუქციის გამოფენა-გაყიდვას შეძლებდნენ“, - განუცხადა ჟურნალისტებს რუსთავის მერმა ნინო ლაცაბიძემ.
რუსთავის „ქუჩის ბაზრის“ 30 მონაწილე ონლაინ-რეგისტრაციით შეარჩიეს, ორგანიზატორებმა სულ 70 განაცხადი მიიღეს.
„ჩვენი მთავარი მიზანია, მათ მცირედით მაინც შევუწყოთ ხელი, რომ უფრო მეტი შესაძლებლობა ჰქონდეთ საკუთარი ბიზნესის განვითარების და მომავალში უფრო მეტი წარმატების მიღწევის“, - განაცხადა რუსთავის მერიის ახალგაზრდობის დეპარტამენტის ხელმძღვანელმა ანელი ჩხარტიშვილმა.
„ქუჩის ბაზრის“ ორგანიზების მთავარი მიზანი ადგილობრივი მცირე მეწარმეების ხელშეწყობა და მათი ნაწარმის პოპულარიზაციაა.
წყარო - რუსთავის მერია