თბილისი, 26 მაისი — Sputnik. საქართველოს დამოუკიდებლობის დღე მსოფლიოს სხვადასხვა ქვეყანაში აღინიშნება, ღონისძიებები ორგანიზებულია საქართველოს საგარეო საქმეთა სამინისტროსა და უცხოეთში ქვეყნის დიპლომატიური წარმომადგენლობების მიერ.
საქართველოს 26 მაისს დამოუკიდებლობის აღდგენის 31-ე წლისთავს აღნიშნავს. საგარეო უწყების მიერ გავრცელებული ინფორმაციით, დამოუკიდებლობის დღესთან დაკავშირებით ტრადიციულად საქართველოს დროშის ფერებში განათდება მსოფლიოს სხვადასხვა ღირსშესანიშნაობები. წელს პირველად მათ რიცხვს დაემატა ალექსანდრიის ბიბლიოთეკა ეგვიპტეში.
გარდა ამისა, საქართველოს დროშის ფერებში განათდება კანადაში ნიაგარის ჩანჩქერი, ავსტრალიის ეროვნული კარილონის შენობა, არაბთა გაერთიანებულ საამიროებში ADNOC-ის შენობა, სამხრეთ კორეაში ქალაქ სეულის მერიის შენობა, საუდის არაბეთში Kingdom Cente-ის შენობა და მსოფლიოს სხვა ღირსშესანიშნაობები.
საქართველოს დამოუკიდებლობის დღესთან დაკავშირებით ბრიუსელის სიმბოლოს, ცნობილი ქანდაკების Manneken-Pis ქართული ჩოხით შემოსვის ცერემონია გაიმართება. ნიუ-იორკში კი საქართველოს დროშის აღმართვის საზეიმო ცერემონია შედგება.
ჩინეთსა და რუმინეთში შოთა რუსთაველის ბიუსტის გახსნა იგეგმება. მექსიკის დედაქალაქის ემბლემატურ მუზეუმში ნაჩვენები იქნება ფილმი „დემოკრატიული მმართველობის ისტორია საქართველოში“. ჩეხეთის ერთ-ერთ უნივერსიტეტში კი შოთა რუსთაველის სახელობის კაბინეტი გაიხსნება.
დღეს თემატური გამოფენები გაიმართება ბელგიაში, დიდ ბრიტანეთში, ლიტვაში, გერმანიაში, სერბეთში, იაპონიასა და კატარში.
საქართველოს ეროვნულ დღესასწაულს სხვადასხვა ღონისძიებებით აღნიშნავენ ასევე შვეიცარიაში, ფინეთში, უნგრეთში, არგენტინაში, იტალიაში, საბერძნეთში, ვატიკანში, ესპანეთში, პორტუგალიაში, პოლონეთში, შვედეთში, ნიდერლანდში, ავსტრიაში, დანიაში, ლატვიაში, ბელარუსში, ბულგარეთში, ქუვეითში, ყაზახეთში, იორდანიაში, თურქეთში, სომხეთსა და აზერბაიჯანში.