თბილისი, 24 მაისი — Sputnik. ევროპაში მაიმუნის ყვავილის გავრცელება შეიძლება უკავშირდებოდეს ბელგიასა და ესპანეთში მოწყობილ ბოლო ორ რეივ-დისკოთეკაზე უწესრიგო სექსუალურ კავშირებს, განაცხადა ჯანმრთელობის მსოფლიო ორგანიზაციის მრჩეველმა დევიდ ჰეიმანმა, რომელიც მანამდე ჯანმოში საგანგებო ვითარებათა დეპარტამენტს ხელმძღვანელობდა.
„ჩვენ ვიცით, რომ მაიმუნის ყვავილი შეიძლება გავრცელდეს ინფიცირებული ადამიანის დაზიანებულ კანთან მჭიდრო კონტაქტით და, როგორც ჩანს, სქესობრივმა კონტაქტმა გააძლიერა მისი გადადება“, — აღნიშნა ჰეიმანმა Associated Press-თან ინტერვიუში.
ექსპერტის თქმით, დაავადების გადაცემის ასეთი მეთოდი მნიშვნელოვნად განსხვავდება ტიპიურისგან. ცენტრალურ და დასავლეთ აფრიკაში, სადაც მაიმუნის ყვავილი განსაკუთრებითაა გავრცელებული, ვირუსი ადამიანს ხშირად დაავადებული ცხოველისგან გადაეცემა.
ინფექციის გადადების შესახებ კომენტარი გააკეთა ლონდონის იმპერიალ-კოლეჯის ვირუსოლოგმა მაიკ სკინერმაც. მისი თქმით, „სექსუალური აქტივობა, რაც ინტიმურ კონტაქტს გულისხმობს, მიუხედავად ადამიანის სექსუალური ორიენტაციისა, ზრდის ინფექციის გადადების რისკებს“.
ჯანმრთელობის მსოფლიო ორგანიზაციის მონაცემებით, დღეისათვის მსოფლიოში მაიმუნის ყვავილის 131 დადასტურებული შემთხვევაა დაფიქსირებული.
ბრიტანეთის ჯანდაცვის სამსახურის ცნობით, ვირუსი ძნელად გადადის ადამიანიდან ადამიანზე და მოსალეობაში მისი ფართოდ გავრცელების რისკი მცირეა. ამჟამად დაავადების სპეციფიკური ვაქცინა არ არსებობს, მაგრამ, ჯანმოს მონაცემებით, ჩვეულებრივი ყვავილის ვაქცინა მაღალი დონის დაცვას უზრუნველყოფს მაიმუნის ყვავილისგანაც.