ოპრა უინფისთვის მიცემული ინტერვიუს შემდეგ წყვილის მიმართ კრიტიკა არ წყდება. აღნიშნულის შემდეგ კომენტარი გააკეთა მეგან მარკლის ნახევარდამ სამანტა მარკლმაც, რომელსაც მეგანთან უკვე წლებია დაძაბული ურთიერთობა აქვს.
სამანტა ამბობს, რომ პრინცი ჰარი ცოლის გავლენის ქვეშაა და საკუთარი გადაწყვეტილებების მიხედვით ვერ მოქმედებს. ის მალე წყვილის განქორწინებასაც პროგნოზირებს. აღსანიშნავია, რომ 56 წლის სამანტას აქამდეც არაერთხელ გამოუთქვამს თავისი „წინასწარმეტყველება“, რომ სამეფო წყვილი „მალე“ ერთმანეთს გაეყრება.
სამანტა მარკლი ვარაუდობს, რომ შესაძლოა პრინცი უკვე კითხვის ნიშნის ქვეშ აყენებდეს მეგანთან ქორწინებას. ის წყვილს მოუწოდებს, სამეფო ოჯახს ბოდიში მოუხადოს იმისთვის, რომ მათ რასიზმში დასდეს ბრალი.
ის ასევე აღნიშნავს, რომ მეგან მარკლი გამოირჩევა ნარცისიზმით და მას „პიროვნული აშლილობა“ აქვს. სამანტა ამტკიცებს, რომ მეგანმა მამას, თომას მარკლს უდიდესი ზიანი მიაყენა, რის გამოც მოუწოდებს მეგანს, რომ მამას საჯაროდ მოუხადოს ბოდიში.
„ვხედავ, რომ მათი ურთიერთობა განქორწინებით დასრულდება, თუ გულწრფელები არ იქნებიან, მათ თავიანთი განცხადებებით ბევრი ადამიანი დააზიანეს. რომელი კაცი იქნებოდა ბედნიერი და რომელი კაცი იგრძნობდა თავს კომფორტულად ისეთი ცხოვრება რომ ჰქონდეს, როგორიც ახლა ჰარის აქვს?! იმ წუთიდანვე, როცა ჰარი მას რაიმეზე წინააღმდეგობას გაუწევს, მეგანისთვის ის საზიზღარი გახდება“, – ამბობს სამანტა მარკლი.
მეგანსა და მის დას ძალიან რთული ურთიერთობა აქვთ. ჰერცოგიანია ამბობს, რომ ის ისე გაიზარდა, რომ სამანტა ნანახი არც ჰყავდა, რომ ორი დეკადის განმავლობაში დასთან ურთიერთობა არ ჰქონია. თუმცა სამანტა სხვა რამეს ამტკიცებს, მისი თქმით, ადრეულ წლებში დებს კარგი ურთიერთობა ჰქონდათ და ამის დასამტკიცებლად ფოტოებსაც აქვეყნებს.