თბილისი, 25 აპრილი - Sputnik. მიღებულია გადაწყვეტილება, რომ 50 წლის ზემოთ ადამიანებს მიეცეთ მტკიცე რეკომენდაცია, გაიკეთონ ვაქცინის მე-4 დოზა, ანუ მეორე ბუსტერი, განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ტელეკომპანია „რუსთავი 2“-ის ეთრეში.
როგორც გამყრელიძემ აღნიშნა, ბოლო მონაცემებით ქვეყანაში კორონავირუსის საწინააღმდეგო ვაქცინის მე-4 დოზა დაახლოებით 4.000-მდე ადამიანს აქვს გაკეთებული.
„50 წლის ზემოთ ადამიანებს მიეცეს მტკიცე რეკომენდაცია, რომ მათ გაიკეთონ მეორე ბუსტერი, ოთხი თვის შემდეგ პირველი ბუსტერიდან ან დაავადების გადატანიდან. რაც შეეხება ქვემო ასაკს, უკვე შევთანხმდით, რომ ეს იქნება 12 წლის ასაკის ზემოთ რეკომენდირებული, იმ ადამიანებისთვის, ვისაც აქვს ქრონიკული დაავადებები“, - განაცხადა გამყრელიძემ.
ამასთან, გამყრელიძემ აღნიშნა, რომ ქვეყანაში ეპიდსიტუაცია მკვეთრად გაუმჯობესადა.
„პირველი სცენარის მიხედვით დაახლოებით ასეა, ვირუსი თანდათან სუსტდება და ის პანდემიური რეჟიმიდან თუ აცრის მაჩვენებელი მთელს მსოფლიოში კიდევ უფრო მეტად გაიზრდება და თქვენ იცით სამიზნე არის 70%, მაშინ ვირუსს ნაკლები შანსი ექნება, რომ არა იმუნურ ფენას შეეხოს და ის გადავა ენდემურ რეჟიმში“, - აღნიშნა ეპიდემიოლოგმა.
მიუხედავად ინფიცირების შემთხვევების მკვეთრი კლებისა, სპეციალისტები მიიჩნევენ, რომ ქვეყანაში კოვიდის საწინააღმდეგო ვაქცინაციის ტემპი უნდა გაიზარდოს.
ბოლო მონაცემებით, საქართველოში სულ ჩატარებულია 2.877.150 აცრა.
საქართველოში მოსახლეობის ვაქცინაცია 2021 წლის 15 მარტს დაიწყო. ამჟამად ქვეყანაში ხელმისაწვდომია Pfizer-ის, Sinopharm-ისა და Sinovac-ის ვაქცინები.