თბილისი, 23 აპრილი - Sputnik. მართლმადიდებელი სამყარო დღეს იერუსალიმში მაცხოვრის საფლავზე ცეცხლის გადმოსვლას ელოდება.
იერუსალიმის პატრიარქი აღდგომის ტაძარში უფლის საფლავზე თბილისის დროით, დაახლოებით 14:00 საათზე შევა და საფლავი დაიხურება. იარუსალიმში იმყოფება ქართველ მომლოცველთა ჯგუფი, წმინდა ცეცხლს საქართველოში კი დეკანოზი შალვა კეკელია ჩამოაბრძანებს.
მართლმადიდებელი ეკლესია დღეს იესო ქრისტეს საფლავად დადებას აღნიშნავს, აღნიშნულთან დაკავშირებით ტაძრების გარშემო დილით გარდამოხსნის შემოტარების წესი შესრულდა.
სასულიარო პირებმა გარდამოხსნა, რომელზეც ჯვრიდან ჩამოხსნილი იესო ქრისტეა გამოსახული ტაძრებს შემოატარეს. იგი სიმბოლურად მაცხოვრისთვის წესის აგებას და მის საფლავში დადებას განასახიერებს.
მართლმადიდებლური ეკლესიის ერთ–ერთი ყველაზე დიდი სასწაული — იერუსალიმში უფლის საფლავის ტაძარში წმიდა ცეცხლის გარდამოსვლა ყოველწლიურად მართლმადიდებლური აღდგომის წინ, დიდ შაბათს ხდება. წმინდა ცეცხლს „ჭეშმარიტების ნათელს" უწოდებენ, რომელიც სიმბოლურად იესო ქრისტეს აღდგომას განასახიერებს. იერუსალიმიდან საქართველოში წმინდა ცეცხლი 1995 წლიდან ჩამოაქვთ, 1999 წლიდან კი მას სპეცრეისით ჩამობრძანებენ.