თბილისი, 14 აპრილი — Sputnik. თეთრი სახლის პრეს-მდივანმა ჯენ პსაკიმ უარყო იაპონური მასმედიით გავრცელებული ინფორმაცია იმის შესახებ, რომ შეერთებულმა შტატებმა, დიდმა ბრიტანეთმა და ავსტრალიამ იაპონიას ალიანს AUKUS-თან მიერთება შესთავაზეს, რომელიც 2021 წლის შემოდგომაზე შეიქმნა.
რამდენიმე დღის წინ ეს ინფორმაცია იაპონურ გაზეთ Sankei-ზე დაყრდნობით გავრცელდა.
„ეს ცნობები არ შეესაბამება სიმართლეს“, — განაცხადა პსაკიმ რეგულარულ ბრიფინგზე, რომელიც NBC News-ის ეთერით გადაიცემოდა.
თეთრი სახლის პრეს-მდივნის თქმით, ეს ვარიანტი ამ ეტაპზე არ განიხილება.
ამასთან პსაკიმ განმარტა, რომ ამ ალიანსში შემავალი სამი ქვეყნის პრიორიტეტი ამჟამად არის მოწინავე შეიარაღების ერთობლივი განვითარების პროგრამის დეტალების შეთანხმება.
„ამავდროულად ეს არ გულისხმობს JAUKUS-ს — [იაპონიის ჩართვას AUKUS-ში]“, — დააზუსტა თეთრი სახლის წარმომადგენელმა.
როგორც მანამდე Sankei წერდა, AUKUS-ის ქვეყნები დაინტერესებული არიან იაპონიასთან პარტნიორობით, რადგან იაპონიის მაღალიტექნოლოგიური პოტენციალი ისეთ სფეროებში, როგორებიცაა კიბერსივრცე, კვანტური ტექნოლოგიები, ხელოვნური ინტელექტი და ა.შ., შეიძლება გამოყენებულ იქნას ჰიპერბგერითი იარაღისა და ელექტრონული ომის განვითარებაში.