თბილისი, 2 აპრილი - Sputnik. საქართველო უზბეკეთიდან ბლოგერებსა და ფოტოგრაფებს მასპინძლობს, იუწყება საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაცია.
ადმინისტრაციის ცნობით, საქართველოში 11 პრეს-ტურის წარმომადგენელი იმყოფება, რომლებმაც უკვე დაათვალიერეს თბილისი და მცხეთა. ბლოგერები ასევე ეწვევიან ანანურს, სტეფანწმინდას, ახალციხესა და ვარძიას, რის შემდეგაც აჭარაში გაემგზავრებიან და სამთო კურორტ გოდერძის დაათვალიერებენ.
როგორც ტურიზმის ეროვნულ ადმინისტრაციაში აცხადებენ, ტურის მიმდინარეობისას ძირითადი აქცენტი ქართულ ტრადიციებსა და კულტურებზე გაკეთდება.
„ტურის მონაწილეები ჩვენი ქვეყნის სხვადასხვა რეგიონს ათვალიერებენ. ძირითადი აქცენტი ქართულ სამზარეულოზე, ღვინოსა და კულტურაზე გაკეთდება. აღნიშნული ღონისძიება ხელს შეუწყობს ჩვენი ქვეყნის პოპულარიზაციასა და ცნობადობის ამაღლებას“, - განაცხადა ტურიზმის ეროვნული ადმინისტრაციის ხელმძღვანელის მოადგილემ თამაზ იორაშვილმა.
საქართველოში მყოფი ერთ-ერთი უზბეკი ბლოგერი აღნიშნავს, რომ საქართველოში მან სტუმარ-მასპინძლობის ნამდვილი „მასტერ-კლასი“ იხილა.
„საქართველო ნამდვილი სამოთხეა, ულამაზესი ბუნება გაქვთ, ძალიან სუფთა ჰაერია, ძალიან მომეწონა თბილისი. მინდა გითხრათ, რომ უზბეკები სტუმართმოყვარე ხალხი ვართ, მაგრამ აქ ჩამოსვლის შემდეგ ჩვენ სტუმარ-მასპინძლობის ნამდვილ მასტერკლასს დავესწარით“, - აცხადებს ბლოგერი ხფის უსუფოვი.
პრეს-ტურის მონაწილეები ასევე მოინახულებენ ქვემო ქართლს, სადაც დაშბაშის კანიონს და სოფელ ასურეთს ესტუმრებიან. ტურის განმავლობაში ბლოგერები სოციალურ ქსელებში ატვირთავენ საქართველოს ტურისტული ადგილების შესახებ ფოტო და ვიდეო რეპორტაჟებს, რომლებსაც ათობით ათასი მომხმარებელი იხილავს.
წყარო - ტურიზმის ეროვნული ადმინისტრაცია.