თბილისი, 30 მარტი — Sputnik. გასულ კვირაში COVID-19-ით ინფიცირებულთა საერთო რაოდენობა შემცირდა, მაგრამ მისგან დაღუპულთა რიცხვი გაიზარდა, იუწყება ჯანმრთელობის მსოფლიო ორგანიზაცია (WHO).
„2022 წლის 21-27 მარტს ინფიცირების ახალი შემთხვევების რაოდენობა წინა კვირასთან შედარებით 14%-ით შემცირდა. მეორე მხრივ, იმავე პერიოდში ახალი ლეტალური შემთხვევების რაოდენობა 43%-ით გაიზარდა“, — ნათქვამია ორგანიზაციის ვებ-გვერდზე გამოქვეყნებულ ყოველკვირეულ მიმოხილვაში.
როგორც WHO-ში აღნიშნავენ, ეს, სავარაუდოდ, გამოწვეულია ჩილესა და შეერთებულ შტატებში COVID-19-ით გარდაცვალების დეფინიციაში ცვლილებებით, ასევე ინდოეთსა და სამხრეთ-აღმოსავლეთ აზიაში „რეტროსპექტული კორექტირებით“.
ჯანმოს მიმოხილვის თანახმად, გასული კვირის განმავლობაში მსოფლიოში 10 მილიონზე მეტი ახალი შემთხვევა გამოვლინდა, დაფიქსირდა 45 ათასზე მეტი გარდაცვლილი.