თბილისი, 30 მარტი – Sputnik. დიდი ბრიტანეთი არ განიხილავს რუსული გაზის საფასურის რუბლებში გადახდის შესაძლებლობას, განაცხადა ბრიტანეთის პრემიერ-მინისტრის ბორის ჯონსონის წარმომადგენელმა.
პრეზიდენტ ვლადიმირ პუტინის დავალებით რუსეთის მთავრობამ, ცენტრობანკმა და „გაზპრომმა“ 31 მარტამდე უნდა მოამზადონ მოხსენება გაზის მიწოდების სანაცვლოდ ვალუტის ცვლილების შესახებ განკარგულების შესრულების თაობაზე ევროკავშირისა და იმ ქვეყნებისთვის, რომლებმაც რუსეთს შეზღუდვები დაუწესეს. ევროკომისია კი შეუძლებლად მიიჩნევს რუსული გაზის მიწოდების საფასურის რუბლში გადახდას.
„კვასი კვარტენგმა (Kwasi Kwarteng - ბრიტანეთის ბიზნესის, ენერგეტიკისა და მრეწველობის მინისტრი - რედ.) კოლეგებთან ერთად ნათლად აჩვენა, რომ რუბლებში გადახდა არ მოხდება“, – განუცხადა სააგენტო Reuters-ს ბრიტანეთის პრემიერ-მინისტრის წარმომადგენელმა.
რუსეთის სახელმწიფო სათათბიროს სპიკერმა ვიაჩესლავ ვოლოდინმა ადრე განაცხადა, რომ სწორად მიაჩნია რუბლის სანაცვლოდ ექსპორტირებული საქონლის სიის გაფართოება. კერძოდ, მისი თქმით, ამ სიას უნდა დაემატოს სასუქები, მარცვლეული, ნავთობი, ზეთი, ქვანახშირი, ლითონები, ხეტყე.
კრემლის წარმომადგენელმა დმიტრი პესკოვმა განაცხადა, რომ ამ წინადადებაზე „შესაძლოა მუშაობა დაიწყოს“.